Seksu

Seksu i ssnen ukkʷ medden deg umaḍal ass-a, d učči amensay n Yimaziɣen. D nitni i t-id-yesnulfan aṭas aya, seg wass mi kerzen tamurt i d-yeƫƫaken irden. Awren i d-yekkan ladɣa seg yirden neɣ si temẓin, ssnen amek ad t-fetlen s uɣeṛval, ad as-rnun tisent. Syen akkin, ad t-sfuṛen cwiṭ, ad t-fesren akken ad yeqqaṛ. Akka, ad yeṭṭef arma d assegʷas neɣ sin.

Si zik, seksu ɣuṛ-s azal meqqʷṛen di tmetti Tamaziɣt. D učči i yeƫƫilin deg yal tagʷniƫ tameqqʷṛant n tudert n Yimaziɣen. Di tlalit, d seksu i teƫƫen yinevgawen d twacult. D seksu daɣen i ƫeggen d imensi ma ad fakken yinelmaden di tesdawit, neɣ deg uɣeṛvaz. Di tmeɣṛiwin, yal amezdaɣ n taddart d inevgi, ad d-yas ad yečč seksu s uksum. Deg wass aneggaru n ussegʷas Amaziɣ, deg yal axxam ad sebbʷen seksu s uyaziḍ i yimensi n Yennayer.

Seksu yeƫƫili di tudert n Umaziɣ arma d taggara. Ma ad yemmet, ad d-asen yimezdaɣ n taddart, ad d-zzin i tvaqit n seksu, ad ččen di tsusmi. Nezmer ad d-nini, seksu iƫeddu akkʷed Umaziɣ, si dduḥ arma d aẓekka.

Aɣvalu

Amagrad n Amayas Tiliwin deg http://tameddit.com