Bahya Faraḥ
 Bahya Faraḥ | |
|---|---|
| Tameddurt | |
| Talalit | Tubiret, 1 Yennayer 1917 |
| Taɣlent | Lezzayer |
| Lmut | Lezzayer, 24 Yebrir 1985 |
| Tiɣri | |
| Tutlayin | Taɛrabt |
| Amahil | |
| Amahil | acennay d amaru |
| Dduzan n lmusiqa | taɣect |
Bahya Faraḥ (1917-1984), s yisem-is awaryan Bunwaṛ Faṭima-Zuhra d yiwet gar tnaẓurin tiqbayliyin i yecnan s teqbaylit. Tlul deg Tubiret deg useggas 1917. Imi d tagujilt, d ɛemmi-s i tt-irebban, yewwi-tt yid-s ɣer Tunes. Dinna dɣa, deg yiwen n uɣsur n usileɣ n tẓuri (centre de formation artistique), i telmed cḍeḥ.
Deg useggas 1931, deg leɛmer-is 14 n yiseggasen, tunag ɣer Lpari, anda i tufa iɣriben i tt-iɛawnen s wayen i zemren akken ur tettmenṭar ara deg yiberdan. Syin akkin, tettekka deg la troupe artistique maghrébine i yessedda unaẓur atunsi Muḥamed Lǧamussi seg 1910 ar 1988. Ɣas akken d cḍeḥ i tḥemmel, testufa-d daɣen i ccna. Tuɣac timezwura i tecna, s teɛrabt, d tid n unaẓur Muḥamed Lkamel (1919-1935) : "Sɣira mesrara", "Bent ammi", "Eddunya" d "Zman EL youm". Deg 1937, temlal d win ara yuɣalen d argaz-is, anaẓur Muḥamed Temmam (1915-1988), tuɣ-t imir-nni d anelmad deg l’école supérieur des arts décoratifs de Paris. Deg useggas 1949 sawlen-as-d deg teẓrigin Pathé Marconi ad tsekles iḍebsiyen-is imezwura, s teɛrabt : "Rayeḥ maɛdum, Ya umri lik" d "Yali qeleqtu".
Ɣas akken, tebḍa la troupe artistique maghrébine, azekka-nni n ṭtrad, ur teḥbis ara Bahya Faraḥ. Twala dakken di tallit-nni i tt-ḥwaǧen mliḥ yiɣriben, i tt-teḥwaǧ Lezzayer. Aṭas dɣa n yinaẓuren yeddren di Lpari i iwufqen ṛray n Bahya. Dɣa tesnulfa-d "La troupe artistique du FLN". Di lawan-nni i d-temlal d Slimane Azem. D timlilit-nni i tt-yerran tettwassen ugar, ladɣa ɣer Leqbayel. Tecna d Slimane Azem tizlit yufraren "kemm d nekk" akked "aṭas ay ṣebreɣ".
Deg useggas 1965, tuɣal-d ar Tmurt. Din din, terra ɣer RTA, texdem d Ccix Nureddin deg ṛradyu tis-snat. Tecna daɣen kra n tuɣac i as-yura Crif Xeddam d Ccix Nureddin. Tsekles di tilibizyu snat n tuɣac, maca ar ass-a ur nwala ara isura-nni. Deg useggas n 1967, uqebl ad tebru i RTA, tsekles tizlit "Tfuk lɣerba, tfuk", d taɣect-is taneggarut. Seg wass-nni, yekkfa wawal ɣef Bahya Faraḥ: imḍebbren ur as-fkin ara azal d ccan i tuklal. Ma d nettat yejreḥ wul-is : mačči akken i tɣil ad tidir di Lezzayer i d-ḥerren yirgazen d tlawin i tt-yecban. Tesɛedda taggara n tudert-is deg tatut, ɛeggu d waṭṭan i d-yeɣlin fell-as, ssexsayen-tt cwiṭ cwiṭ almi d asmi i tewweḍ s anda ara naweḍ ass amenzu n yibrir 1984.