Azrem

Si Wikipedia, tasanayt tilellit.
Neggez ar: ẓer isebtar, anadi

Azrem (asget: izerman) d aɣersiw agelmaḍ, tafekka-nnes d tarqaqt, d taɣezfant, ur tesɛi iḍarren. Azrem ur yesɛi imeẓẓuɣen, wala taɣect, wala irgalen. Llant 19 n twaculin n leṣnaf n yizerman yerna ass-a, ttwassnen 2.900 n leṣnaf seg-sen.

Amur ameqran seg yizerman tteddren deg tmura yeḥman. Aglim-nsen d alewwaɣ yerna tdel-it tekbert. Izerman sɛan iẓri igerrzen, yerna ssuffuɣen-d iles-nsen akken ad ḥulfun i lbenna n lhawa, imi s yiles-nsen ay zemren ad ḥulfun i "rriḥa" n wayen ay d-yezzin fell-asen. Izerman ur sɛin taɣect, maca zemren ad ṣeffren. Amur ameqran seg leṣnaf n yizerman tteddren ɣef wakal, maca llan kra n leṣnaf ay itteddren deg waman, yerna llan ula d wid ay itteddren ddaw wakal. Izerman, am wakk leṣnaf n yigelmaḍen ( tizermemmuyin, ifekren, atg.), ḥwajen ad ssiẓnen tafekka-nsen i tfukt, acku idammen-nsen d isemmaḍen yerna ḥwajen ad srekden taẓɣelt-nsen. Ɣef waya ara naf amur ameqran seg leṣnaf n yizerman ddren deg tmiwa tiẓeɣɣalin n umaḍal.

Ihriren (ssem)[ẓreg | ẓreg aɣbalu]

Leṣnaf n yizerman ttemgerraden s yiniten-nsen (llwan). Kra n yizerman sɛan initen yeɣman (am uberkan, ademdam ed waras) yerna sseqdacen initen-a akken ad sdergen iman-nsen deg wemkan aydeg llan. Maca izerman ay izewwqen s yiniten icebḥen (am wewraɣ neɣ azewwaɣ) zemren ad ilin d leṣnaf yesɛan ihriren (ssem). Initen-nsen sseqdacen-ten d aɛeyyen akken ur d-ttqerriben ɣer-sen yiɣersiwen ara ten-yeccen. Maca llan kra n leṣnaf n yizerman ay izewwqen s yiniten icebḥen am wid-nni ay yesɛan ihriren, i wakken ad sbeɛden iɣersiwen niḍen ɣef yiman-nsen.

Abeddel n teslest[ẓreg | ẓreg aɣbalu]

Simal yettimɣur wezrem, simal yettbeddil aglim-nnes, dɣa yettajja aglim-nni aqbur (umi ɣɣaren "tislest"), yerna yettbeddil-d wayeḍ. I wakken ad ibeddel wezrem tislest-nnes, yettḥukku iɣef-nnes ɣer kra n tɣawsa taḥercawt (am weẓru neɣ asɣar). D aya ara t-yejjen ad yesseqdec tislest-nni-nnes, sakkin, azrem yettkemmil yettḥukku iman-nnes arma yessenser-d tafekka-nnes seg weglim-nni aqbur.

Tuccit[ẓreg | ẓreg aɣbalu]

Akk leṣnaf n yizerman ddren s ṣṣyada n yiɣersiwen niḍen. Kra n yizerman tteqqsen iɣersiwen ay ttṣeyyiden yerna neɣɣen-ten s yehriren-nsen (ssem). Izerman itteqqsen sɛan ihriren deg tculliḍin yellan deffir wuglan-nsen. Mi ṭṭfen aɣersiw s wuglan-nsen, ad as-gren ihriren ɣer daxel n tfekka-nnes. Izerman sseblaɛen tuccit-nsen ɣef tikkelt yerna war tuffẓa. Mi ara yili uɣersiw-nni meɣɣer, azrem yezmer ad yessenṣel igumas-nnes yerna ad yesnejbad imi-nnes anect n uɣersiw-nni ara yecc. Izerman tteddun s udemmer akked uzzuɣer n tfekka-nsen, s tmeẓwalin (muscles) ay sɛan deg yiɛebbaḍ-nsen, yerna zemren ad ddun s tɣawla ɣef yiɛebbaḍ-nsen. Mi yessebleɛ wezrem tagemrawt-nnes (proie), ad teqqim deg tfekka-nnes arma texdem-itt tɛebbuḍt-nnes. Amur ameqran seg yizerman ttṣeyyiden iɣersiwen imecṭuḥen ay ttafen deg wakal am yiɣerdayen, tizermemmuyin neɣ igra (imqerqren). Izerman n waman ttetten daɣen iselman. Wid yettalyen ɣer yisekla (ttjuṛ) ttṣeyyiden igḍaḍ neɣ ttetten timellalin ay ttafen deg yigedfen (leɛcuc).

Ɣas ma yella izerman ttetten aṭas, maca zemren daɣen ad ṣebren i laẓ. Kra n medden ttṛebbin izerman deg wexxam (deg yisendyaq n wesmeɣ [jjaj]) yerna zemren ad ten-jjen ayyur war ma sseccen-ten.


Taɣbalut[ẓreg | ẓreg aɣbalu]

http://tasedkalt.wikidot.com/yizerman