Takfarinas Ḥsen Zermani
 Takfarinas Ḥsen Zermani | |
|---|---|
 | |
| Tameddurt | |
| Talalit | Lezzayer, 25 Fuṛaṛ 1958 (66 n yiseggasen) |
| Taɣlent | Lezzayer |
| Amahil | |
| Amahil | acennay |
| Dduzan n lmusiqa | taɣect |
- ASEFHAM : Ma tettnadiḍ Takfarinas, d aqerru n trad mgal Rruman, ruḥ ar Takfarinas agellid
Ḥsen Zermani, s yisem-is n taẓuri, Takfarinas, d yiwen unaẓur n ccna atrar aqbayli. Ilul deg taddart n Tqesray deg useggas n 1958. Tiqesray d yiwet n taddart i d-yezgan di Ledzyer tamanaɣt, teččur d iqbayliyen.
Lameɛna Ḥsen Zermani, yefruri-d deg wul n tmurt n Leqbayel, di taddart n Tizi Tɣideṭ, taɣiwant n Iɛekkuren di temnaṭ n Tizi Wezzu.
Ḥsen Zermani, akken d ameẓyan yufa-d iman-is d anaẓur am waṭas n iɛeggalen di twacult-is. Iḥemmel ad yecnu maca, werǧin yerra di ddehn-is d akken a d-yas wass ad yaweḍ ɣer wanida yewweḍ ass-a acku, di tallit-nni n 70, yeqwa-d lḥers ɣef tmurt labaɛda ɣef tutlayt n tmaziɣt.
Ḥsen Zermani iḥemmel aṭas aẓawan, imeddukal-is d tawacult-is ladɣa baba-s, sḥersen-t akken ad iruḥ ɣer nnuba n iḥeffaḍen uzekka n umaṭṭaf wis II yella a yeselḥay unaẓur Crif Xeddam, acku walan-t icennu akken iwata.
Amecwar-is di ccna
[ẓreg | ẓreg aɣbalu]Deg useggas n 1976 iɛedda-d di tesgilt-agi, anda yewwi arraz amezwaru. Akken ad t-yessebɣes, baba-s yuɣ-as-d snitra-s tamenzut acku, yella yetturar s snitra i d-yexdem s tebelyunt n zzit. Dɣa dinna yekcem s annar n tẓuri s yisem i yefka i yiman-is Takfarinas, i yellan d isem ugelid deg umezruy imaziɣen. Mi d-yufrar Takfarinas di nnuba n iḥeffaven, yessekles aḍebsi-ines amezwaru Yewwa ṛṛemman ɣer Maḥbubati d l’Oasis, maca, amahil-agi d win ur s-neɛǧib ara.
Deg useggas n 1979 iruḥ ɣer Fransa, din Yemlal d Yidir i d-yesnulfan axxam n usizreg Azwaw anda yessewjed ad iɛiwed i usekles n uḍebsi-nni-ines maca, ɣer tagara yessuffeɣ-it-id ɣer tezrigin Triomphe music.
S wakka Takfarinas yuɣal d iminig, am netta am tugti n icennayen iqbayliyen yerwa lḥif, yerwa aksar d usawen akken a d-iḥelli amḍiq-is. Almi d asmi i yexdem Yidir tameɣra di l’Olympia deg useggas 1980 i yebda yettifrir-d Takfarinas. Imi yecna di tmeɣqra-yagi. Deg wakken yeɛǧeb aṭas i lɣaci, yenced-it-id Buǧemɛa Semɛun, neɣ Buǧma Agraw akken ad cnun lwaḥid, yeqbel ad yiki deg Agraw imir-nni i d-suffɣen tasfift Ccef n uparti maca ikemmel deg usuffeɣ n iḍebsiyen i yiman-is: Aɛessas n zher-iw; Zzin d wedrim deg useggas n 1983. Yuɣal yemsefraq netta d tarbaɛt n wegraw.
Deg useggas n 1986 yessuffeɣ-d sin iḍebsiyen Way telha; Arrac, deg-sen iɛawed yessefti deg umareg, akken ad t-yesnerni. Deg wayen yeɛnan isefra yexdem d imedyazen imeqranen yecban Ben Muḥemmed, Muḥya, Bessaɛud Muḥend Aɛrab, Muḥend Umusa, Mulud Ayt Ɛmer, ma d tura ixxedem d Kader.
ɣer tama n imedyazen-a Takfarinas yugem-d aṭas di tgemmi n ccna aɣerfan wid yecban Lɛenqa, Ccix Lḥasnawi, Sliman Ɛazem... atg.
Mbaɛɛd Arrac, Way telha, Aɛessas, Zzin d wedrim, Takfarinas yessuffeɣ-d aḍebsi Ṛṛemman s wayes yettiki deg tesgilt n Hit parade de world music Europe charte, din i d-iḥella amḍiq wis ukuẓ deg useggas 1994.
Deg useggas n 1996 yessuffeɣ-d Salamat, deg useggas n 1999 yerna-d sin iḍebsiye n Zaɛma zaɛma, Ddu deg wa d iḍebsiyen i isekren lhul deg umaḍal meṛṛa ladɣa di tmurt n Lezzayer.
Deg useggas n 2004 yessuffeɣ-d ukuẓ n iḍebsiyen ideg yerra tajmilt i tlawin anda bɣunt ilint.
Takfarinas d anaẓur ameɣradan
[ẓreg | ẓreg aɣbalu]Takfarinas yexdem d inaẓuren n umaḍal am tarbaɛt Sixun i deg yella Michel Alibo, Louis Winsberg, Karim Ziad, atg. Ma deg uḍebsi-yagi aneggaru yexdem d umaṛṛuki Idbasaɛid, rnu ɣer-s inaẓuren n ddunit meṛṛa am Jef de la Cruse, Yin Jian, Jamaikan Sly Dunbar d Robbie, atg.
Takfarinas yefka isem n YAL i ccna-ines, ɣef wanect-agi yenna-d :
Tamselyut
[ẓreg | ẓreg aɣbalu]- http://www.imyura.net Archived 2013-08-12 at the Wayback Machine
- http://www.takfarinas.net Archived 2007-04-27 at the Wayback Machine
- http://www.salammbo-press.com/artiste14/bio.htm Archived 2007-05-29 at the Wayback Machine