Warẓigen

Si Wikipedia, tasanayt tilellit.
Jump to navigation Jump to search
Warẓigen (Lyristes plebejus)

Warẓigen d abeɛɛuc-nni yettsuɣun deg unebdu. Yemgarad wamek ay s-qqaren deg tmiwa timaziɣwalin, yernu tudert-is tessewham, aṭas n medden ur tt-nessin ara. Amur ameqqran deg-neɣ ssnen kan dakken warẓigen itteffeɣ-d deg unebdu i wakken ad aɣ-yesseḥreq s usuɣu-nni-yines. D acu kan, warẓigen mačči ala deg unebdu kan ay yettidir, wanag taḥkayt-is ɣezzifet.

Deg Tmurt n Leqbayel warẓigen yesɛa aṭas n yismawen : qqaren-as warẓigen neɣ awerǧeǧǧiḍ (neɣ werǧeǧǧi, awerǧeǧǧin, iwrejrej, warjejig) deg Yiwaḍiyen akk d tmiwa ay ten-id-iqerben, ẓẓdec (neɣ ẓẓdeč, ẓẓdeǧ, tteẓẓdeč) deg kra n tmiwa nniḍen. Qqaren-as daɣen abẓiẓ deg tama n Ɛin Lḥemmam neɣ awejwaj deg jijel d Agmuḍ n bgayet. Yella daɣen wawal warẓigen (neɣ warzigen, arzug), acku yettakk anzi ɣer "wa iẓeggen" d isem n ubeɛɛuc-agi s tmaheɣt- akk d "awerǧeǧǧiḍ", d isem yesɛan talɣa talugant, nezmer ad d-nessuddem seg-s asget war uguren (awerǧeǧǧiḍ > iwerǧeǧǧiḍen).

Warẓigen d abeɛɛuc alemmas, yesɛa ger n 2 d 5 yisuntimitren, d "azuran" u tafekka-s (ṣṣura-s) teččur d anẓaden. Warẓigen yesɛa rebɛa wafriwen. Mi ara yafeg, nezmer ad ten-nwali. Yesɛa sin wafriwen imeqqranen (d wid n ufella) akk d sin wafriwen d imecṭuḥen (wid n wadda). Afriwen-is d ifrawanen (transparents) u ttbanen-d deg-sen "yiẓuran".

Warẓigen yettidir deg tmura yeḥman. Nezmer ad t-naf deg wakk timura ay d-yezzin ɣef yilel Agrakal. Ma deg Turuft, warẓigen ur yettidir ara deg tmiwa anda ay qessḥet tegrest (ccetwa). Nezmer ad t-naf deg Fransa, maca deg Briṭanya Tameqrant, yettidir kan deg wenẓul.

Warẓigen itteffeɣ-d mi ara yebdu ad iḥemmu lḥal, deg waggur n Yunyu , yeḥwaǧ anebdu yeḥman d aɣezfan i wakk-n ad yesɛu lweqt ad yefrurex. Taṣebḥit, akk-n kan ara taweḍ teẓɣelt ɣer 22 n tfesniwin (22° C), ad yebdu warẓigen ad yettsuɣu. D amalay ay yettsuɣun i wakk-n ad d-yejbed unti, dɣa asuɣu-yagi d ayen yessefken ɣer iwerǧeǧǧiḍen i wakken ad frurxen.

Warẓigen dima nettaf-it deg yisekla (ttjur), imi din ay yettaf ayen ara yečč. Yuɣ lḥal, warzigen itett aselɣaɣ (sève) n yisekla, yettsummu-t s yiwen ujeɛbub ay yes ay ineqqer taferkit (iqcer) useklu-nni.

Unti n warẓigen tettarew timellalin-is deg yemɣan akk d yifurkawen yekkawen, yeqquren. Tezmer ad tessers ger 200 d 300 n tmellalin timecṭuḥin. Timellalin-a ad d-frurxent ger Ctember d Tuber, mi ara d-yaweḍ wemwan (lexrif). Akken kan ara d-tefrurex twekka n uwerǧeǧǧiḍ, ad tekcem s akal u ad teffer din. Tawekka-ya tezmer ad tidir alamma d 4 yiseggasen ddaw wakal !!! Yernu d aselɣaɣ n yiẓuran n yemɣan ara ttett deg tallit-a. Tawekka n uwerǧeǧǧiḍ tettbeddil talɣa 7 yiberdan deg rebɛa-yagi yiseggasen. Sakk-in, asmi ara d-teffeɣ "twekka"-ya seg wakal, ad tbeddel "aglim" i tikkelt taneggarut, u ad d-yeffeɣ seg-s ubeɛɛuc-nni yesɛan afriwen u yezmer ad yafeg, warẓigen-nni ay nessen.

Warẓigen mačči s yimi-s ay yettsuɣu, wanag yesɛa yiwet n teglimt ger wedmar-is d tɛebbuḍt-is, yetthuzzu-tt, dɣa d nettat ay d-ittgen imesli-nni (ṣṣut) yesseḥraqen. Zik, llan imassanen la ttxemmimen dakken warẓigen, ɣas yettsuɣu, maca ur yezmir ara ad isel. Anamek-is ɣas ma yella warẓigen itteg-d imesli iǧehden, maca netta d aɛeẓẓug, ur yezmir ara ad as-isel. Jean-Henri Fabre (1823-1915) d yiwen umassan n yibeɛɛac afrensis, yeɛreḍ ad d-yessebgen. Fabre yenna-d dakken mi ara t-iwali warẓigen, ad yeḥbes seg usuɣu, deg lweqt ay deg mi ara yeffer ɣef warẓigen-nni u ad yebdu ad ixeddem lḥess, warẓigen-nni ur yettsusum ara, ad ikemmel ad yettsuɣu, amzun ur yesli i wacemma. I wakken ad d-yefk ttbut(anza) dakken warẓigen ur isell ara, Fabre yewwi-d lmedfeɛ yewwet yis-s yiwen useklu (ttejra) yeččuren d iwerǧeǧǧiḍen ara yettsuɣun. ɣas lmedfeɛ-nni iga lḥess d ameqqran, iwerǧeǧǧiḍen-nni ur ssusmen ara , kemmlen la ttsuɣun, amzun acemma ur yeḍri. D aya ay yeǧǧan Fabre ad d-yini dakken iwerǧeǧǧğiḍen d iɛeẓẓugen s tidet.

D acu kan, aya yezmer ad aɣ-d-iban d aɣwali, d ayen ur nettwafham, d ayen yessewhamen. Yuɣ lḥal, ma yella awerǧeǧǧiḍ yesseqdac asuɣu-yines (ay yellan d imesli - d ṣṣut) i wakken ad d-yejbed unti-yines, ihi unti-nni-yines yessefk ad as-t-sel i wakken ad d-tas ɣur-s (!!!). Maca deg yiseggasen n 1960 d 1970, sbegnen-d yimassanen dakken unti n uwerǧeǧǧiḍ tezmer ad tsel i yimesliyen s wesnagar (fréquence) yemgaraden ɣef win ay yes nsel nekkni. Lḥess ara teg tiyita n lmedfeɛ zemren ad as-slen yemdanen, maca awerǧeǧǧiḍ ur yezmir ad as-isel.

Deg Yiwunak Yedduklen n Marikan, yettidir yiwen n ṣṣenf n warẓigen, d netta ay d abeɛɛuc yesɛan leɛmer aɣezfan akk deg umaḍal (ddunit). Wagi qqaren-as awerǧeǧǧiḍ n Temrikt n Ugafa (tawsit/ssenf Magicicada). Abeɛɛuc-agi yessewham imi asmi ara d-yefrurex, "tawekka-yines" tettidir 17 yiseggasen s ddaw tmurt, sakk-in, yettaweḍ-d wass ay deg d-tteffeɣ, tteqqel d awerǧeǧǧiḍ amengaḍ (adulte). Awerǧeǧǧiḍ-agi yettidir deg wegmuḍ (ccerq) n Yiwunak Yedduklen, u itteffeɣ-d deg tlemmast n Magu, mi ara taweḍ teẓɣelt ɣer 17 n tfesniwin (17° C). D acu kan, ayen yessewhamen ugar netta dakken awerǧeǧǧiḍ-agi, asmi ara d-yeffeɣ seg wakal, yettidir kan yiwen yiḍ. Deg yiḍ-nni ara d-ffɣen akk waytmaten-is, ad suɣen, ad frurxen, unti ad tessers timellalin-is, u mi ara yali wass, ad mmten merra.

Warẓigen ak° d tweṭṭuft[ẓreg | ẓreg aɣbalu]

Warẓigen iban-ed daɣen deg kra n tmucuha. D amedya, amauru arumi La Fontaine yeḥka-d yiwet n tengalt ɣef werǧeǧǧiḍ akk d tweṭṭuft. Deg tengalt-agi, awerǧeǧǧiḍ yeqqim la icennu s teɣzef n unebdu, deg lweqt ay deg taweṭṭuft la tqeddec i wakken ad teg lɛewla i tegrest (ccetwa). Tangalt-agi tettwassen deg tmaziɣt. Deg tmurt n Leqbayel (At Yiraten, At Dwala, Iwaḍiyen), ḥekkun-d akken d amceddal (d yiwen n ṣṣenf n uweṭṭuf, d ameqran), ay yemmuten seg usemmiḍ. Dɣa qqaren-d dakken yella wemgerrad ger uweṭṭuf akk d wemceddal. Aweṭṭuf ijemmeɛ lɛewla, deg lweqt ay deg amceddal "yettazzal kan, iteddu kan", ur yesɛi lmeɛna. ɣef waya ay d-yeqqim wanzi-nni : Deg unebdu, ḥuff, ḥuff, deg ccetwa, rḍel-iyi-d ay aweṭṭuf. "Ḥuff" anamek-is "nadi, qelleb" deg teqbaylit n Tuǧa.

Ismawen n warẓigen[ẓreg | ẓreg aɣbalu]

Ma d isem n ubeɛɛuc-agi yuklal daɣen ad as-neqqim. "Warẓigen", akken d-nniɣ sufella-yagi, yettakk anzi ɣer "wa iẓeggen" n tmaheɣt n Uhaggar. Deg tmaheɣt, awal-a anamek-is "win iẓeggen" neɣ "aɣersiw-nni iẓeggen" d acu kan, ur ssineɣ ara d acu ay d anamek n wemyag "iẓeggen" deg tmaheɣt, yernu ula d anaḍ (impératif) n wemyag-agi ur t-ssineɣ ara s ttbut. "Iẓeggen" d amaɣun (participe). Amaɣun-agi yesɛa talɣa n "ikessen" (n wemyag "eks"). Dɣa anaḍ n "iẓeggen" ad yili "eẓg". Ahat "eẓg" anamek-is "zɛeḍ, ɛeyyeḍ, suɣ", u d netta ay d-yefkan amyag n taɛrabt taɣerfant "ẓgi" ("raw yeẓgi-lek" > "la d ak-d-yeɣɣar/la d ak-d-yessawal"). Ihi, deg laṣel, "wa iẓeggen" ad yili unamek-is "win yettsuɣun". Ma d "warẓigen" ad yili yekka-d seg wawal-nni n tmaheɣt neɣ tmaziɣt taqburt.

Awal "ẓẓdec" yezmer ad yili daɣen yekka-d seg uẓar n *eẓg, dɣa ad yili ibedden kan akk d zzman (?).

Ma d awal "awerǧeǧǧiḍ", yettemcabi ɣer "warẓigen", maca wissen ma yella seg-s ay d-yekka. D acu kan, la ttxemmimeɣ dakken awal-a nezmer ad t-nesseqreb ɣer "cicada" ay yellan d isem alatini n uwerǧeǧǧiḍ. Isem-agi n "cicada" yekka-d seg tegrigit, kiccos (taglimt/membrane) et ado (cnu), meḥsub "taglimt icennun". "Kiccos-ado" n tegrigit yefkayefka-d "cicada" deg tlatinit, u aneggaru-yagi yefka-d "cigale" deg tefrensist. Deg tlatinit, "cicada" yettwanṭaq-d [čikada], dɣa yezmer lḥal ad yili "awerǧeğǧiḍ" yekka-d seg "cicada". Ta d tamuɣli-yinu tudmawant.

Tamselyut[ẓreg | ẓreg aɣbalu]