Madeleine Allain

Si Wikipedia, tasanayt tilellit.
Jump to navigation Jump to search
Madeleine Allain
Tameddurt
Talalit 1915
Lmut Verrières-le-Buisson, 6 Ctamber 2002
Lxedma
Lxedma amaru

Soeur Madeleine Allain (1915-2002) S teɣzi n 50 d aseggas, Sœur Madeleine, ur teǧǧi amḍiq deg tmurt n Leqbayel. Adrar yettak-itt i wayeḍ, taddart terna-tt i tayeḍ deg uzaɣar n Sumam. Anda tekka ad d-teǧǧ later, akken daɣen ansa i d-tekka yettaǧǧa-d deg-s later.

Sebɛa n yiseggasen i yezrin segmi i aɣ-teǧǧa, Sœur Maddeleine, tamdakelt-nneɣ talsawit. Tensa ass n 7 ctenber 2002 di sbiṭar deg Lpari. Sœur Madeleine Allain, yelli-s n La Bretagne, tlul ass 08 meɣres aseggas 1915 di Morbihan. Mi tekfa leqraya-s, terza-d deg useggas 1939 ɣer tmurt n Lezzayer. Cwiṭ cwiṭ, tettsennid-d ɣer yidles azzayri, tlemmed ayen tezmer, tesselmad ayen tezmer. Terna kra, tuɣ isem n Sœur de Louis de Vincennes. Ur tessaɣzef ara taswiɛt, tefka amḍiq deg wul-is i yidles amaziɣ, akken daɣen ula d imaziɣen ldin-as-d, gren-as-d iɣallen. Seg useggas 1940 armi d 1970, tezdi, terna tekki ɣer uheyyi n tesɣunt F.D.B. (Fichiers Documentation Berbère) ɣer yidis n Jean-Marie Dallet.

Mi tedder kra tallit gar lxalat n tudrin n Leqbayel, teẓra amek nḥafent, teddem rray ad teldi aɣsur amaziɣ n uselmed i teḥdayin (Centre d’Etudes Berbères Feminins, C.E.B.F). Tebda-tt deg taddart Waɣzzen deg temnaḍt n At Mengellat, umbeɛd taẓ ɣer Tizi Wezzu, akken ɣer taggara ad d-taf amḍiq di Larebɛa Nat Iraten. Sœur Madeleine, seg tid iḥemlen idles. Anagar i tebda tettaɣ aẓar deg tudrin d yidurar n Leqbayel, tebda tlemmed tutlayt taqbaylit. ɣer useggas 1949, tesɛedda terbeḥ akayad n tutlayt tamaziɣt, mi zrin 2 yiseggasen, tekka-ten deg Tunes, tuɣal-d tesɛedda terbeḥ aselkin (le Diplôme) n tutlayt tamaziɣt deg la Faculté n Lezzayer tamaneɣt.

Mi d-tuɣal ɣer uxeddim, teslul-d yiwet n terbaɛt ideg kkint lxalat d tifransiyin akked lxalat tiqbayliyin, tid i tessendah ɣer ulqaḍ d tira n yisefra, tamedyazt, timucuha d lɛadat tiqbayliyin. Imar yakan Sœur Madeleine, twala lexsara ara d-tesseggri lɛada timawit ma ur sen-nettwalleh ɣer uḥraz-nsent s tira.

Amagrad amezwaru tura-t ɣef lɛadat n Leqbayel, deg useggas 1947. Nnig n yimagraden i tura deg tesɣunt F.D.B, terna tessufeɣ-d sin n yedlisen ɣef yilugan n tira n tmaziɣt. Akken daɣen i d-tesnulfa, nettat akked Sœur Lucienne Brousse, timsirin i uselmed n tutlayt tamaziɣt yuɣen isem Tizi Wuccen, i d-yesiẓreg Salem Caker deg useggas 2000.

ɣer yiseggasen imezwura n temrawt 1970, terza-d ɣer Bgayet, anda tettkellef s lecɣal n udawi. Hah d aselmed n tiyiti n tsegnatin, hah d aswilleh ɣef waman, … Ulac win ur tt-id-yemyagren ula d tikelt teṭṭef abrid s tazzla, ɣef uḍar, seg temdint armi d uxxam-is deg lḥuma Iḥeddaden. Tuɣal taqbaylit gar teqbayliyin. « Yefka-yas Rebbi lhiba. Ayen tesɛa tebḍa-t d wid i as-yezzin. Mi ara tleḥḥu deg yiberdan n temdint Bgayet, anda tekka qrib 20 yiseggasen, ur tferqeḍ gar-as d teqbaylit. » D tameṭṭut mm sser yekmel.

Sœur Madeleine, seg tid yusmen, seg tid i d-yečča wul-nsent akken ad d-skeflent idles, ur izedder deg tattut. Tcemmer ɣef yiɣallen-is, tebda anadi ɣef yidles d tutlayt tamaziɣt.

Seg teḥdayt ɣer tmeṭṭut, seg umɣar ɣer temɣart, tettḥawac-d ayen tezmer d lɛadat d yimeslayen n tmaziɣt, wid i d-tettarra d imagraden neɣ d tiktabin.

Ass 30 meɣres aseggas 1995, ɣef tmeɣra n umulli w-50 n INALCO, tettunefk tazalɣi (medaille) n yiseɣ i Sœur Madeleine, ɣef leqdic akk teqdec ɣef tmaziɣt.

Tekka qrib aseggas deg sbiṭar di Lpari, uqbel ad tt-id-yeɛnan lajel, ad tens ass n 7 ctenber 2002.

Ayen tessarem, tura-t deg tebratt i tura, ass n 27 dujember 1993 : « Riɣ, a win yufan, akken i d-yerna wass, taqbaylit ad tuɣal d alag n tarwa-s, mačči d iberraniyen ara yarun fell-as. »


Ayen akk i d-teseẓreg s teqbaylit :

Kra n lemtul (1946) ;

Aqcic yumnen yella Rebbi di mkul mkan (1946) ;

Tajmaɛt (1946) ;

Tamɛayt n bu yedmim (1948) ;

Zzwaǧ di tmurt n Leqbayel (1960) ;

Aselmed n tutlayt tamaziɣt (1960) ;

Adeqqi deg At Smaɛil-Ǧerǧer (1971).

Mohand Ait Ighil