Urigami azegriran
D acu i d urigami azegriran ?
Urigami azegriran d tawsit seg ger tewsatin n tẓuri n wurigami. D aḍfas n tmudemt s wugar n yiwet n tferkit. Yal tiferkit d aferdis ara nesdukel akked wiyaḍ i as-yeččabin s uḍefs neɣ s usmikcem n wa deg wa alamma tekfa tmudemt. Aferdis-a nettini-as azegrir, asegget-is nettaru-t akka : Izegriren. Akk izegriren s umata kifkif-iten. Asnulfu n tmudemt s yizegriren yebḍa ɣef sin yeswiren. Aswir n usnulfu amezwaru, yers ɣef usnulfu n tmudemt n uzegrir sakin ad neḍfes ssegsen aṭas. D azegrir-nni ara nessemres d azadur i usnulfu n tmudmin yesɛan talɣa i nebɣa amedya n talɣa n uɣersiw, n umdan, n tɣawsiwin nniḍen… Akken tebɣu tili talɣa n tmudemt i nebɣa ad nesnulfu, yessefk ad nheggi aṭas n yiferdisen neɣ ayen i umi nettini : Izegriren. Izegriren yellan deg unrar aẓuran n wurigami azegriran mmeẓlen, seg wa ɣer wa. Llan kra sɛan tazmert akken ad nesnulfu yes-sen aṭas n tmudmin yemmeẓlen deg talɣa amedya n uzegrir ‘’ Akedis uslig bu 4 leǧyub’’. Nezmer ad nini fell-as d azegrir ara yefken tilelli tameqqrant i umurigam ad yesnulfu tamudemt i yebɣa akken tebɣu tili talɣa-as... Llan daɣen izegriren nniḍen amedya n uzegrir ‘’Amkuẓ uslig n wudmawen’’, snat talɣiwin kan ara nezmer ad neḍfes yes-s, tamudemt takurant neɣ tin n ugasas. Ɣef umedya, ur nzemmer ara ad nesnulfu tamudemt n walbaɛḍ iɣersiwen… Yezmer ad yili uzegrir d asnulfu-nneɣ, am wakken yezmer daɣen ad yili yekka-d ansi nniḍen. Ulac deg-s aɣilif ma nerḍel-it-id ɣur umurigam nniḍen akken ad nesnulfu tamudemt-nneɣ. Aswir wis sin, d asnulfu n tmudemt i nebɣa s usemdey neɣ asali n yizegriren. Asemdey yettili-d s useḍfes neɣ s usmikcem n wa deg wa akken ad nessileɣ talɣa i nebɣa ad as-tt-nefk i tmudemt-nneɣ. D wa i d iswi ayiwen n uzegrir. Ugur yellan deg tewsit-a n wurigami, d ameskan. Aglam n usemdey neɣ asali n tmudemt deg wurigami azegriran akken ad yezmer menwala ad as-d-yales, taswiɛt-a, mazal i as d-nufa iɣef-is akken ilaq. Yal amurigam yettaɛraḍ ad d-yessumer ameskan ara yefrun ugur-a.
Amezruy awezlan n tẓuri
Adlis amezwaru i d-yemmeslayen ɣef wurigami azegriranr yura-t ujapuni Hayato Ohoka, iẓreg-d deg useggas 1734, azwel-is : Ranma Zushiki. Ad naf deg-s yedda-d ugasas n ukaɣeḍ yesɛan 6 izegriren yemmeẓlen deg yiniten. D agasas i umi fkan isem n tamatebaku (tamatebako).
Deg useggas 1993 i d-yenna Yasuo Koyanagi belli agasas-a d win akken i umi ttinin Tamatebaku deg tenfust n useyyad iselman. Sakin d mass Masao Okamura, anmezray n wurigami i d-itebten ayen i d-yenna yakan Yasuo Koyanagi. Ɣas akken ulac ameskan n ugasas-a, Masao Okamura yules-as-d i tmudemt.