Tamatebaku
Tanfust n ugasas Tamatebaku (Tamatebako)
Tamatebako d tafniqt neɣ d ayen i umi nettini tabwaḍt n ukaɣeḍ, tedda-d deg yiwet n tenfust taqburt n tmurt n Japun. D tanfust n yiwen n uṣeyyad n yiselman isem-is Urashima Taro (asusru-s d wa : Uracima Taru). Ass-nni yella yettmerriḥ ɣef yiri n yillel, iteddu ɣef yejdi armi yufa igurdan tturaren s yiwet n tefkert n wanan, ssulin-as tasawent… Asmi iwala lbaṭel sɛeddan fell-as, yekker yekkes-asen-tt, yerra-tt s aman, truḥ. Maca tifkert-nni d tageldunt, d yellis n ugellid n yillel
I wakken ad as-ter lxir, tageldunt Otohim (asusru-s d wa : Uṭuhim), akka i d isem-is, tenced-it-id ɣer tgelda-s yellan ddaw waman akken ad as-terr tajmilt. Mi yewweḍ ɣer teɣremt Ryugu-jo (asusru-s d wa : Ryugu-ju) yellan ddaw waman n yillel, yewhem, iɣil d targit i yettargu seg waken tecbeḥ. Yeqqim din kraḍ (3) wussan, ixaq, icedha ad yuɣal s axxam-is, ad iwali imeddukal-is… Yekker yessuter i tgeldunt Otohim ad terr ansi d-yekka. Asmi twala akken, qbel ad t-id-err s akal n tmurt-is, tefka-as asefk, d tabwaḍt ireqmen s ureɣ akked yeẓra ɣlayen, maca tweṣṣa-t tenna-as : “Ḥader ad teldiḍ tabwaḍt-a”. Mi d-yuɣal Urushima s akal, yufa ziɣ mačči 3 wussan i d-yesɛedda maca 300 iseggasen. Kullec ibeddel, ixxamen, iberdan, imeddukal-is akk mmuten, ulac win i t-yesnen. Iteddu weḥd-s armi d-yemlal d yiwen wemɣar yesteqsat, yenna-as ma yella wasmi i yesla ttmeslayen-d medden ɣef yiwen wemdan isem-is Urashima Taro. Yerra-as-d wemɣar-nni, yenna-as ih, sliɣ nnan-d fell-as iruḥ s illel, 300 iseggasen aya, seg wass-nni ur d-yuɣal. Ɛeddan wussan, ur yufa ara iman-is. Yemmekta-d tabwaḍt-nni i as-d-tefka tgeldunt, yeddem-it-id yeldi-tt, yebɣa ad iẓer d acu i yellan daxel-is. Dɣa, yeffeɣ-d wabbu amellal, am tagut yers fell-as. Din din icab, yuɣal d amɣar awessar yesɛan deg leɛmer-is 300 iseggasen. Cwiṭ akka yesla i taɣect n tgeldunt Otohim as-d-sbecbuc s ameẓẓuɣ-is, tenna-as ; “Yak nniɣ-ak ur leddi ara tabwaḍt-nni acku yella deg-s leɛmer-ik n tidet”. I lmend n tmacahut-a i d-snulfan tamudemt n ugasas i umi ttinin : Agasas Tamatebaku.