Sidi Sliman
Ttebyita “zerda” n Sidi Sliman
Yal mi ara inessef waggur n ɣuct, tettili-d ttebyita n lemqam n Sidi Sliman, i d-ttheyyin 2 tudrin Lmecta d At Sellam, i d-yezgan di tɣiwant n Iɣrem tama Uqbu. Sidi Sliman, akken i d-qqaren, d yiwen lwali gar lawliya i d-yusan si Fas di tmurt n lmerruk ɣer tmurt n leqbayel. Yedder gar lqern w-16.
Di tirza-nneɣ ɣer dinna, yella-yaɣ-d umeslay d wid i d-iheyyan ttebyita. « Zzerda-agi, nxeddem-itt 2 yiberdan deg useggas ; tamezwarut tettili-d di tefsut, tis snat deg unebdu. Tikelt-a, nezla 9 yezgaren d 25 n yiqelwacen, tugget d sadaqa i d-ttusedqen. » i aɣ-d-yenna Dda Leḥlu Benamara, yiwen n yimḍebbar n At Sellam.
Ma yella d iswi-ines, yal yiwen amek i tt-yettwali ; temxallaf tmuɣli gar yimeqqranen d yimeẓẓyanen. Dda Salaḥ, yiwen n umɣar i yekkin deg ugraw n ddɛawi n lxir, yettawli-tt d asfillet ɣer wayen yelhan am wakken i aɣ-t-id-yenna deg wawal-is : « d tagnit n usdukel n ccmel, d useḥbiber ɣef leɛwayed iwakken ad d-qqimen ad tent-id-afent tsutwin i d-iteddun. ». Ma d Nna Ferruǧa, yiwet n temẓayert, tenna-k : « zik yeɣli-d llaẓ ɣef medden, dɣa ttgen lwaldin-nneɣ tameɣra-agi iwakken ad ččen s tawant, axi tikelt di tudert-nsen, ula d ameksa d umuḍin ttaǧǧan-asen amur-nsen. » Ma yella d ilmeẓyen, tezzi tmuɣli-nsen ɣer tullas kan : « di ttebyita kan i nettwali zzin uffir yeffren deg yixxamen, d tagnit n zzwaǧ, d acu kan ad tmuqleḍ kan s wallen, lehdur d ? interdit alamma yenɣel seksu. » i d-yenna Sliman seg taddart Lmecta.
Leqdic d wamek i d-yettili
Ar ass-a, leqdic deg ttebyita n Sidi Sliman, mazal yettili-d s wallalen d iqburen, d ayen i d-irennun di ccbaḥa-s. Amek ?
Di 2009, ad naf asewwi mazal-it ɣef yisɣaren. Ddurt uqbel ad taweḍ tmeɣra ; d imezdaɣ n tudrin-agi ay yettruḥun i uzdam n yisɣaren. « Times n tqecrin n ubelluḍ trennu-d lbenna i ṭṭɛam i ntett di Sidi Sliman », i aɣ-d-tenna Nna Messaɛd, yiwet n temḍebbert ɣef tneftalin n seksu. Maca, ayen uɣur tezzi lwelha s waṭas d tifeḍniwin ideg sewwayen lmerqa, ttwaxedment s nneḥḥas. Ɣef waya, yenna Dda Rabiɛ : « akka i asent-id-cfiɣ, yenna-k baba di ddula n uterki i tent-id-uɣen. »
Ttebyita n Sidi Sliman ur tettɛedday ara kan akka mebla ẓẓdiḥ. Ad yifsus yiḍ ɣef yiqeddacen yessewwayen alamma yuli wass, ɣef yimẓuyar yettɛawazen yid-sen. Tteksen jjiq s ccḍeḥ, d ucewwiq !