Guy de Maupassant

Si Wikipedia, tasanayt tilellit.
Jump to navigation Jump to search
Guy de Maupassant
Maupassant 2.jpg
Tameddurt
Isem-is ummid Henry-René-Albert-Guy de Maupassant
Talalit Tourville-sur-Arques akked Dieppe, Ɣuct 5, 1850
Taɣlent Fransa
Tagrawn n uzdar French people Suqel
Tutlayt tayemmat Tafransist
Timekkest Passy akked Paris, Yulyu 6, 1893
Ideg n uẓekka Montparnasse Cemetery Suqel
Tamentilt n tmekkest natural causes Suqel (syphilis Suqel)
Tiɣri
Alma mater Lycée Henri-IV Suqel
(1859 -
Lycée Pierre-Corneille Suqel
(1868 - 1869)
Tutlayin Tafransist
Amahil
Amahil short story writer Suqel, playwright Suqel, aneɣmas, novelist Suqel, amaru, author Suqel akked amedyaz
Important works Bel Ami Suqel
Boule de Suif Suqel
Prizes
Influenced by Honoré de Balzac Suqel akked Émile Zola
Amussu literary realism Suqel
Artistic movement ungal
Military service
Yennuɣ deg Franco-Prussian war Suqel
IMDb nm0560943
Firma de Maupassant.jpg

Ilul Henry – René – Albert – Guy DE MAUPASSANT ass n 05 ɣuct 1850 di teɣremt n Miromesnil di Tourville-sur-Arques, ɣer tama n Dieppe, deg Ugafa n Fransa. Imawlan-is msebḍan mi yesɛa 12 n yiseggasen. Yesɛedda temẓi ines taseɛdit d yemma-s deg ugama n La Normandie, anda ixuleḍ at taddart uɣur i d-yessen tameddurt n yifellaḥen d yinsayen nsen.

Yekker-d ger lecḍuḍ d lberr, tesḥer-it tugna n waman. Mi meẓẓi, iteddu d yiṣeggaden ɣer ceṭṭ i tegmert, d ilemẓi inehher taflukt deg wasif n La Seine, yessikil deg Ugrakal.

Mi yekfa almud-is, ssawlen-as, yelsa d aɛsekri di tallit n umgaru ger Fransa d Lalman. Acḥal d tikelt i d-yebder tirmi-s n tallit-a di tullisin-is anda i d-isugen lfetna ; d lɛada taweḥcit, imenɣan ger yiɣerfan d tifrat n tkerkas ur nettwaqbal.

Mi yekfa wemgaru, yexdem deg Weɣlif n tegriwa (la marine), sakkin deg Welmud azayzan (publique) anda yettwali tudert tabiruqratit iɣef iqejjem di lehmum d lɛeqliyyat n yimdanen i yudes di tirawin-is tiseklanin. Ɣas akka, yeqqim d axeddam amedyan ; iquder iman-is, qudren-t yiɣellaten-is. 

Segmi d-tufrar tullist-is : Takurt n Tassemt (Boule de Suif), MAUPASSANT yebda tira deg yeɣmisen iɣer t-iwelleh Gustave Flaubert i yas-iseknen iɛewwajen n tsekla, yeḥbes seg uxeddim-is akken ad yidir d imserreḥ aḥrur. Bdan-as wuguren n tezmert. Imagraden i yettaru di tɣamsa, uɣalen-as d asluɣmu d tannant i t-yullen ɣef tira.

Di temrawt 1880-1890, yura setta wungalen : Une Vie deg 1883 ; Bel-Ami deg 1885 ;  Mont-Oriol deg 1887 ; Pierre et Jean deg 1887-1888 ; Fort comme la Mort deg 1889 ; Notre cœur deg 1890 akked 305 ger tullisin d tmucuha. 

Iweddeb-it waṭan n nnaqsa (névralgie) i yas-isewlellsen allen-is, yerna yesnulfa-yas-d amerɛun, ikemmel-as Syphilis, armi yuɣal yezzer di lweswas, yezga yettwali tamettant-is ; dɣa yeɛreḍ ad ineɣ iman-is weqbel ad t-tekcem tselbi d wekraf armi yemmut ass 06 Yulyu 1893. Yettwamḍel di tenḍelt n Montparnasse s tilin n yimeddukal-is, gar-asen Émile Zola.

Timmadit-is (personnalité)[ẓreg | ẓreg aɣbalu]

MAUPASSANT, isebgen-d tidmi-s ; yebɣa ad yili d ilelli ibeɛden ɣef yikabaren isertanen, ibeɛden ɣef yiɣerbazen iseklanen d yiculen inuẓar (courants artistiques). Ɣas yettunebgat sɣur timetti tunnigt n tallit-is, iḥemmel agama, iḥemmel taywennit (solitude), iɣucc axaleḍ d wuḍan n zzhu n yinesbaɣuren. Yenna deg yiwet si tebṛatin-is :

Kra n wemdan yebɣan ad yeḥrez iman-is, ama d tilelli n tekti, taɣawsa, tudert, talsa akked umaḍal s tiṭ n umannay ilelli, ilaq-as ad yebɛed maḍi ɣef yenna-tenna. Ad yebɛed ɣef teflas d tesraḍ yettwawṛaten. Ad yebɛed ɣef uxaleḍ d wassaɣen n tmetti, ayen ?

Imi tuccḍa akked leḥmeq, neṭṭḍen amdan s zzerban bla ma ifaq ; ad yaɣ abrid nsen, ad yelḥu deg-s tikli-nsen, ad yettxemmim s ttxamim nsen.

Yenneɛtab seg yilem i yas-d-yezzin d wulac n tudert, MAUPASSANT, izdeɣ-it lweswas, hban-t wumran ; d ayen i yas-yekksen asirem n ḥellu. Yenna ɣef waya :

« Ẓriɣ gwriɣ-d iman-iw, sserhaben-iyi wuḍan iɣezfanen n tusaft.

Yettuneḥsab ɣur-s uḥulfu n teywennit d lmektub, di tedmi-s ur yumin tella leḥmala ger yemdanen ; wa ur ikeccem deg wul n wayeḍ, amsefhem gar-asen d awezɣi. Ayagi, yettban-d di tirawin-is s tmuɣli n layas alqayan ɣef tudert akked tmetti.

Taẓuri ines(art) :[ẓreg | ẓreg aɣbalu]

MAUPASSANT, yeɛǧeb-as aṭas Gustave Flaubert, ababat-is aseklan uɣur yelmed asekfel n tilawt s ttfaṣil, yeskad amaḍal i yaɣ-d-yezzin s tmeẓra-s, _ tucmitin d tucbiḥin _ yesɛa tamuɣli tuzzigt (spécifique) ɣef teẓrilawt (réalisme) akked teẓrigama (naturalisme), d win yettxemmimen s tekdit ɣef ugama ideg yettidir, ideg d-yekker, tid i wumi ur ifaq yiwen weqbel-is. Yella d amdan yettḥussun mačči d win yettḥulfun. Yeqqar :

« Ɣur-i  asugen asemmaḍ ilaw. Ḥemmleɣ ayen ẓerreɣ… ur sɛiɣ ara iman aḥulfan.’’

Taẓuri ines, tezdeɣ asugen ilaw n tɣawsa d tekli n wemdan akked tmetti. Ur yeḥbis ara deg usugen n yal amkan i yudef : agama d yinsayen n yimezdaɣ-is, timetti n Lpari d leɛceq ines, lgirra d lfejɛat-is…

Ma d isental-is i d-yettuɣalen s ṭaqqa deg wayen yura, ggten, gar-asen : Tayri d wassaɣen-is, igen d wemgaru, takdit d lexdeɛ, tigullelt d wayla, tamgerḍt d ttaṛ, tagmert d usgunfu, jjiḥ d tlawin, aman d yillel, tamettant d tselbi, atg. Maca, deg waya akk, MAUPASSANT, yemmug am unaẓur ; ur yebɣi ara ad aɣ-d-yesken tugna n tudert, maca ad aɣ-d-ifek tamuɣli-s lqayen yemmden, tin iqerben yettqerriben ɣer tilawt.

I wakken ad yaweḍ iswan-is, MAUPASSANT, iseqdec aɣanib asehlan d uweɛran. Tafyirt-is d tafessast tefses d leqniɛa n tudert n yidgan igellem. Maca, isental-is qqnen s initen d yinsayen n Fransa n tallit-is, ladɣa wid n temnaḍt n La Normandie, tikwal yuɛer, neɣ ahat d awezɣi ad yenfali wemdan ɣef tefses yellan akk di tutlayt-a s tutlayt-niḍen.

Ayen yura[ẓreg | ẓreg aɣbalu]

  • 1850: Talalit n Guy De Maupassant di teɣremt Miromesnil ɣer tama n Dieppe.
  • 1860-1862: Amsefreq n yimawlan n Guy.
  • 1863-1868: D anelmad di tsuddut n yimrabḍen n tmezgida n Yvetot.
  • 1868: Guy, yekcem ɣer tesnawit n Rouen. Yemlal d Louis Bouilhet akked Gustave Flaubert.
  • 1869: Yewwi-d agerdas n baccalauréat di Caen.
  • 1870-1871: Yella deg yigen.
  • 1872: Yekcem s Aɣlif n Tegriwa.
  • 1875: Isuffeɣ-d Afus n Umeslux La Main  d’écorché, d tamacahut.
  • 1878: Yekcem s Aɣlif n Uselmed Azayzan.
  • 1880: Yessazreg Takurt n tassemt Boule de Suif akked yisefra. Ɣur-s uguren n tezmert, Yessakel ɣer la corse.
  • 1881: Axxam Tellier La maison Tellier, d amud-is amezwaru n tullisin. Yessakel ɣer Lezzayer. Yebɣa ad ineɣ iman-is segmi wlellsent wallen-is.
  • 1882: Tamsiwt Fifi Mademoiselle Fifi.
  • 1883: Tameddurt Une Vie’’, timucuha n Uɣbub Contes de la Bécasse. Talalit n mmi-s amenzu.
  • 1884: Asizreg n Tamsiwt Harriet Mademoiselle Harriet ; Tiyessetmatin Rondoli Les sœurs Rondoli ; I Yiṭij Au Soleil, d aɣmis ; Tiziri Claire de Lune; talalit n yelli-s.
  • 1885: Timucuha n wass akked yiḍ Contes du jour et de la nuit ; Bel-Ami. Yessakel daɣen ɣer la Corse.
  • 1886: Mass Parent Monsieur Parent; Tasegdalt Tamecṭuḥt La Petite Roque; Mont-Oriol (ungal s yeḥricen). Yessakel ɣer tmurt n Legliz.
  • 1887: Le Horla ; ungal Pierre et Jean. Talalit n yelli-s tis-snat.
  • 1888: Amgud n Ujeǧǧig n Massa Husson ‘‘Le Rosier de Madame Husson’’, Ɣef Waman ‘‘Sur l’Eau ; d iɣmisen n usikel.
  • 1889: Afus azelmaḍ La Main gauche ; ungal Tuɛer am tmettant Fort comme la Mort.
  • 1890: Ul nneɣ Notre cœur; Tameddurt taglawant La Vie errante; Tafulki tarumɛint L’Inutile Beauté.
  • 1891: Yeɣli d amuḍin.
  • 1892: Yebɣa ad ineɣ iman-is.
  • 1893: Talwit n twacult La paix du ménage, d tamezgunt ; Tamettant-is ass n 16 Yulyu.
  • 1945: Tamezgunt tawdiɛt (posthume) Ɣer yifer n ujeǧǧig, axxam aṭurki À la feuille de rose, maison turque, yura-tt deg useggas 1875.