Aḥeddad n lqalus

Si Wikipedia, tasanayt tilellit.

Taddart n Lqalus tura trab. Qqaren ass-mi itt-mazal tebded, yella deg-s yiwen uḥeddad yesɛa cci, yerna ɣur-s tameṭṭut teẓiḍ di ṣṣifa.Yiwen n wass qqimen kra n lɣaci la heddṛen di tejmaɛt, inṭeq-d yiwen yenna-as :

-Lemmer ad iyi-tcehdem, ad kkseɣ i uḥeddad tameṭṭut-is.

Nnan-as:

– I kečč s lɛaqel-ik?

Yenna-asen:

- Reggmet-iyi kan ar ad iyi-tcehdem.

Lɣaci reggmen-as( weɛden-as). Iruḥ ar tejmaɛt n ccraɛ,yenna-asen:

-Sliɣ i uḥeddad yebra i tmeṭṭut-is s tlata-fi-tlata. Ihi yekkes-as-tt ccraɛ. Aql-i nekk bɣiɣ ad tt-aɣeɣ.

Nnan-as :

– D lmuḥal !

Yenna-asen belli ẓran medden.

Nnan-as : -Awi-d ihi inagan .

Iruḥ yewwi-d inagan-nni i as-ireggmen di tejmaɛt. Cehden-as. Tajmaɛt teḥkem belli tennebra tmeṭṭut n uḥeddad lqalus. Truḥ. Imir yuɣ-itt urgaz-nni. ɣer taggara uɣalen armi kksen i uḥeddad ula d tiferkiwin-is.

Tella di taddart n Lqalus yiwet n temɣart tegra-d weḥd-s, ur tesɛi ḥedd. Tewweḍ-d tefsut; bdan medden la teffɣen ɣer tferkiwin-nnsen. Ala tamɣart-nni acku ulac win ara teğğ deg uxxam-is . Ass-nni truḥ s aḥeddad tru-as. Yenna-as :

-Ma tebɣiḍ ad am-ggeɣ ttawil?

Tenna-as :

- D acu yebɣa uderɣal, a mmi? Yak d tafat…

Yenna-as :

- Ad am-xedmeɣ tasekkart ara yetteskkiren axxam-im si beṛṛa.

Di lweqt-nni tiwwura ttsekkirent kan si sdaxel. At taddart, akken walan tamɣart, mi tsekker tawwurt-is ad truḥ ar lexla mebla akukru. Imir bdan ad d-ttazzalen ɣer uḥeddad iwakken ad asen-ixdem tisekkarin si beṛṛa ula d nutni.

yexdem-itent, maca mkul yiwet yuqem-as snat n tsura, yiwet yeğğa-tt ɣur-s, tayeḍ yefka-tt i bab-is. Yiwen n wass amesbaṭli-nni d tmeṭṭut-is txuṣṣ-iten tmes,yenna-as i tmeṭṭut: -Ruḥ awi-aɣ-d cwiṭ n tmes sɣur uḥeddad . Tenna-as :- Annaɣ! Anwa udem iyes ara t-qableɣ? Yenna-as :- Nniɣ-am ddem aceqquf truḥeḍ. Truḥ. Mi tewweḍ tbedd, tegguma ad tqerreb. Aḥeddad iwala-d tili-s,yenna-as : -Qerreb-d. Tenna-as : d nekk! Yenna-as :- Nniɣ am qerreb-d. Tenna-as :-Nniɣ-ak d nekk.Ur iyi-d-teɛqileḍ ara? Yenna-as :- Ẓriɣ d kemm, qerreb-d. Tekcem, tenna-as: -Acu la txeddmeḍ a bunnkuz ? Yerra-as s tmeɣrut agi:(-uz-).

Xeddmeɣ i medden akk lxir nekk d aḥeddad si Lqalus

Ul-iw Yettagem ineqqel ha-t-an di lhemm ur ixuṣṣ

Ad kwen-ttreɣ a lawliya At Mraw akk d wat Ɛrus

Aqli la neğğṛeɣ azduz Ay at Ṛebbi get-as afus

Tuɣal tmeṭṭut s axxam. Yenna-as urgaz-is: -Acu i m-id-yenna? Teḥka-as, tules-as-d ifyar i as-d-yenna uḥeddad. Dɣa yenna-as: -Tettakeḍ awal i butirgin! yeččur kan d awal... Di tama n Lqalus tella yiwet n taddart temsaɛdaw yid-s; wwḍen armi qrib i tt-xlan. Iruḥ yiwen n wass uḥeddad ɣer yimḍebbren n taddart-nni, Yenna-asen: -Ayen iḍran yidi teẓram-t.Tura ma tebɣam ad awen-zenzeɣ taddart, ad tt-texlum.

Nnan-as :

-Amek?

Yenna-as :

-Ilaq taɛessast-nwen mkul iḍ ad n-tqaraɛ s-axxam-iw; Mi d-twalam ɣer ṭṭaq ajajiḥ n tmes azzelt-d. Yiwen n yiḍ aḍu la issafag iqremyad. Medden akk ṭṭsen. Aḥeddad yekker, yebda-d i taddart si ṭṭerf. Axxam iɣef iɛedda isekker-as tawwurt si beṛṛa.Yuli ɣer taɛrict n uxxam-is, yeddem tadla n yiɣlel, yessaɣ- itt, yessɛedda-tt-id si tṭaq. Aɛdawen walan-d ajajiḥ mebɛid, uzzlen-d s sslaḥ. Zzin i taddart si mkul idis, mekknen-as times. Tendeh, tleḥḥu armi d-yewweḍ s ixxamen imezwura n taddart.Laɛyaḍ yekker.Win yemmɣen ɣef timegḥelt, ad iruḥ ad d-yeldi tawwurt, ad tt-yaf tsekkeṛ si beṛṛa.

Aḥeddad n lqalus yerra-d ttar n wayen texdem deg-s taddart-is.

Akka i tenger taddart-a n Lqalus.