Ɛumar Xaleq

Ɛumar Xaleq
Tameddurt
Amahil

Ɛumar Xaleq (s trumit : Omar Khaleq (Izem)), ilul-d ass n 28 ɣuct 1990 g iɣrem n Ikniwn g Ṣaɣṛu anẓul ugmiḍ n tmazɣa tutrimt. Issnta taɣuṛi nnes g tgrumma tanmlant Bugafer dffir as iddu s usinan n usmuttg Ɛssu Ubaslam illan g Ikniwn (ⵉⴽⵏⵉⵡⵏ). Ismd Yizem tiɣṛi nnes g usinan n usmdi Bu-mal n Dads allig yumẓ Bakaluṛya nnes g tskla d tussniwin tinafganin g usggwas n 2011. Izem am netta am qaḥ imezrawn n usammer wenna d yiwin Bakaluṛya nnes iqqn t inn ad immuddu afad ad ifukku taɣuṛi nnes g tsdawit, Izem netta idda s Amur n wakuc (Marrakech ). Istey Ɛumar Xaleq asaka n umezruy d tɣerma allig digs yumẓ turagt nnes asggwas n 2015. Yamu Yizem g mayd igan tirsal irar d iman i Umussu Adelsan Amaziɣ g wayaw n Umur n wakuc isbdd as aḥmmaṛ, iddeɣ ntta d yan sg imeɣnasen ixatarn n Umussu adelsan amaziɣ sg temẓi nnes (ikka g umussu n inelmadn d tweɣni n Ayt Ɣiɣuc). Aya ayd yudjan Izem ad ittnaɣ af tmaziɣt s idammen nnes.

Tadggwat n wass n usiḍyas 23/01/2016 ittut Yizem d imeddukkal nnes dat n tsdawit s ifassen n icenga n tmaziɣt (winna ittinin i iɣfawen nnsen gan imezrawn n tgdudt taɛrabt taṣḥrawit/ Ljumhuriya Lɛarabiyya Ṣṣaḥṛawiya). Zrin kan wussan idrusn ffɣen yiman tafgga n Yizem acku ittunbar s ijenwiyn d tkuba d mayd akw igan amrig n wuzzal ass n 27/01/2016.

Ass n 28/01/2016 yuder Yizem g iɣrem nnes Ikniwn gr idurar n Ṣaɣṛu g wakal n imarawn nnes d ayt mas iẓẓeln iṛumiyn g isggwasn n 1933 1934.

ass n 5/03/2016 ittuga usmmekti n wass wiss 40 n tmettant n Yizem g Ikniwn manen nn akw imeɣnasn n Umussu Adelsan Amaziɣ ad sefsisn xf tawja n imeqqzi. Iffeɣ d yan udlis igan amud n tmdyazin assaɣ nnes IⵣM ismun kullu timedyazin ittyarun af Ɛumar s tmaziɣt d tfranṣiṣt d teɛrabt.

ass n 5/02/2017 tettuga tfugla n umulli n usggwas amezwaru n tmettant n Yizem g iɣrem n Ikniwn.