Anafag n Lezzayer Tamaneɣt - Huari Bumedyen
Anafag agraɣlan n Lezzayer Huari Bumedyen (akaram IATA: ALG • akaram OACI: DAAG) d anafag agraɣlan azzayri, yezga-d di taɣiwant n Ddar Lbiḍa, 16 n yikilumitren deg wegmuḍ n tlemmast n Lezzayer tamanaɣt.
Seg useggas n 2019, anafag n Huari Bumedyen yewweḍ ɣer tezmert n 22 n yimelyunen n yimsiklen deg useggas. Aya s lmendad n tuẓẓumt n useɣzef n unafag amaynut.
D anafag ameqqran akk di tamurt n Lezzayer, d netta i d anafag amezwaru n Tefriqt deg wayen yerzan tazmert. Yezwar unafag n Johannesburg di Tefriqt n Wenẓul (21 n yimelyunen n yimsiklen deg useggas). D acu kan, anafag n Lezzayer tamanaɣt ur yeṭṭif ara amḍiq amezwaru deg Tefriqt deg wayen yerzan azal n yimsiklen d sselɛa.
Qrib 25 n tkebbaniyin n tmesrafegt ay ixeddmen deg unafag-a. Deg 2023, anafag n Lezzayer yesɛa azal n 8 n yimelyunen n yimsiklen, 5,6 n yimelyunen seg-sen sseqdacen iberdan igraɣlanen.
Amezruy
[ẓreg | ẓreg aɣbalu]Anafag n Lezzayer tamanaɣt yettwabna deg useggas n 1924 deg tallit n ussehres afransis. Yella yettwassen s yisem n base aérienne 149 Maison Blanche. Yella yetwasexdam i leqdicat n lɛeskeṛ aroumi.
Di tallit n Ṭṭraḍ Amaḍlan Wis Sin (1939-1945), anafag-a sseqdacen-t yiɣallen n Yiwunak Yeddukklen.
Asmi i d-tewwi Lezzayer tilelli-s di 1962, yuɣal d anafag n Lezzayer-Ddar Lbiḍa. Mbeɛd mi yemmut uselway n tegduda Huari Bumedyen, ddula teṭṭef rray ad as-terr tajmilt s tikci n yisem-is i unafag ass n 05 yennayer 1980.
Ass n 26 Ɣuct 1992, deg tallit n yiseggasen iberkanen, teṭṭerḍeq yiwet n lbumba deg unafag-agi tenɣa 9 n yemdanen. Arnu, ass n 24 Dujembeṛ 1994, ṭṭfen irebraben imsiklen n usafag n tkebbanit tafṛensist Air France. Mbeɛd tadyant-a tameqqrant, Air France d waṭas n tkebbaniyin tigraɣlanin-nniḍen gzemt-d deg rray ad ḥebsent akk isafagen-nsent ɣer Lezzayer. Ur d-uɣalent ara ɣer Lezzayer armi d asmi ifuk ccwal acḥal n yiseggasen deffir tadyant-a.
Deg 2006, yettwaṛẓem yiwen n lebni amaynut ay yesɛan tazmert n 6 n yimelyunen n yimsiklen.
Ass n 29 yebrir 2019, yekcem deg uxeddim yiwen n lebni amaynut s tezmert n 10 n yimelyunen n yimsiklen. Lebni-agi tebna-t-id yiwet n tkebbanit n tmurt n Ccinwa isem-is China State Construction Engineering (CSCEC). Deg wass-nni kan, yeldi yiwen n ubrid n tmacint yettruḥun seg unafag ɣer teɣsert n SNTF n Agha deg tlemmast n Lezzayer tamanaɣt.
Amesni n yisafagen
[ẓreg | ẓreg aɣbalu]| Aseggas | 2000 | 2005 | 2010 | 2015 | 2019 | 2020 | 2021 | 2022 | 2023 |
|---|---|---|---|---|---|---|---|---|---|
| Imsiklen | 2 760 000 | 3 400 000 | 4 350 000 | 6 879 630 | 7 849 488 | 1 699 086 | 2 100 000 | 6 300 000 | 8 000 000 |
Iḍuman n 2020 d 2021 neqsen s waṭas s sebba n waṭṭan n covid-19.
Tikebbaniyin timeqranin n tmesrafegt
[ẓreg | ẓreg aɣbalu]Aṭas n tkebbaniyin i iqeddcen i unafag n Lezzayer tamanaɣt. Tamezwarut deg-sent d Air Algérie (neɣ Azwu n Lezzayer), takubbanit taɣelnawt n tamurt tazzayrit.
Isafagen n Air Algérie ttawin imsebriden ɣer ddeqs n temdinin n tamurt n Lezzayer (Wehran, Beccar, Qsenṭina,...) akked timura tibeṛṛaniyin i d-yezgan deg Uruba, Tafriqt, Kanada, Ccinwa d waṭas n timura taɛrabin.
Ma d Tassili Airlines, takebbanit icudden ɣer terbaɛt n Sonatrach, tettawi imsebriden ɣer temdinin n unẓul n tmurt (Taɣerdayt, Ḥasi Mesɛud, Ǧanet, Tamenɣest,...) d kra n temdinin n Fransa am Paris neɣ Strassburg.
Llant aṭas n tkebbaniyin tiberraniyin i ixeddmen deg unafag n Lezzayer tamanaɣt, amedya Air France, Transavia, Tunisiair, Saudia, Qatar Airways, Emirates, Turkish Airlines, Lufthansa, British Airways, Air Canada, Vueling,...