Timsennent

Timerqemt

Taɣect neɣ ccna n tmerqemt

Timerqemt d afrux amecṭuḥ. Ur tuwiḍ ara anect n yiziwec. Rric-ines, d urqim, yeččur d initen; taqamumt-is, d taqermaḍt, d tubrint, twulem i usufeɣ n waqqayen yefren deg txeddacin n yimɣan.

Timerqemt, teshel i tukza, deg laxla. d tazewwaɣt n wudem, tettawi asun awraɣ deg yiferrawen-is. Rric n uqarru-s d aberkan seg unyir ɣer tmelɣiɣt; d amellal ɣef yidisan. Allen-is d timibrikin, ddant akked cwiṭ-nni n tebrek i igezmen tezwaɣ n wudem-is, tama n yimi.

Taɛrurt n tmerqemt, tdel s yincew aras; win n tedmert d tama n wadda, d amellal imal cwiṭ ɣer uzredxan; iferrawen-is d teqjimt-is d iberkanen, recmen s temlel. Asun awraɣ icerḍen teɣzi n yiffer yettban nezzah deg waffug.

Tiqejjirin n tmerqemt, d tixuxiyin am uglim n tciṭa n yimɣi yefsan.

Taɣect d ccna

Ccna n tmerqemt d amxalef. D aẓawan aḥnin s way-s tettwassen ccetla-s.

Tamezduɣt

Timerqemt tettidir deg laxla, anida llan yimɣan yerxan am useɛluǧ n tɣeddiwt d umadaɣ. Tḥemmel daɣen zṛubat n tebḥirin d yiran n iberdan, tiregwa n waman.

Tazdelt-is, tetteg ɣef tseḍwa yerxan, tama n yimɣan yessefruruyen absis. Daymi tḥemmel ad tezzi deg yimukan yezgan d lbur.

Učči

Timerqemt, tḥemmel ugar n lḥebb yettilin deg txeddacin n yilɣan n tɣeddiwt. Aqamum-is ubrin yebbeẓ, iwulem i lqeḍ d usenser n ubsis yeffren deg txeddacin n yimɣan d tfeɣwa d yizumbiyen.

Asefrurex

Tawtemt tbennu tazdelt-is ɣef useklu. Tetteg-itt d tameẓẓyant. Teggar-itt s wadal n waman d yimɣan lewwaɣen; ussu-ines d rric aleqqaq neɣ d taduḍt n wulli. Mi turew tasartut-is (4 ar 5 tmellalin, recment s yini imiwriɣ), ad tezdel fell-as. Azdal, ittekk seg 12 ar 14 n wussan. Ad teqqim akken alama tekfa tallit-nni. Kra tekka dinna, d awtem ara tt-iɛegcen.

Melmi i d-neqqren yisefraraxen timellalin-nni, ad d-ffɣen ɣer tafat, tteḥwiǧin tagella akken ad kkren. Ttɣimin deg lɛec 13 ar 16 n wussan. Seččayen-asen yimawlan-nsen s nnuba absis urḍib i xeznen deg ugaẓuẓ imi mazal-iten ur zmiren ara i wayen yeqquren. Sakkin, ad adren ɣer wakal. Dinna i beddun selqaḍen-ten yimeqranen, ttheyyin-ten akken ad idiren iman-nsen.

Tiski

Llant temreqmin timezgiyin, llant tminigin. Ttidirent gar Tefriqt n Ugafa akked Turuft.

Aggaz d usmun

Timreqmin, teddunt ad negrent. Zik-nni ggtent deg laxla; ass-a, jlant gar wallen. Tteggiden-tent medden; ggaren-tent deg laqfus i ccbaḥa. Deg ssuq n yefrax, d timreqemt akk i yeɣlayen gar yifrax. Rnu daɣen, anekcum n wakal iburen i yettuɣalen d timizart n tfellaḥt neɣ d adda i usali n tudrin d yiɣerman swaɣayen tudert n tmerqemt.

Ass-a, ccetla tettwaḥrez, tanduyt tettwagdel. Maca, iseggaden ttkemmilen ahdum-nsen, ɣas barra i usaḍuf i ggaren aḍar. Ar melmi ?

Taɣbalut

Adlis n tmaziɣt n useggas wis 3 n ulmud alemmas n tmurt n Lezzayer (sb 66-67), yuran s ufus n yimeskaren :

• Yeḥya BELLIL
• Ɛli LEWNIS
• Ṛemdan ƐACUR
• Nabila ḤALIT
• Lḥafid ḤAǦU