Taggayt:Icennayen n Dzayer
Kul mi ara a nebɣu a niḥfiḍ
Nettṛuḥu nqessed lɛeqqal
S tmussni a ɣ d-bnun lḥiḍ
Yal aẓru rran deg-s awal
I lukan a nbeddel lxiḍ
A nṛuḥ a neqsed imehbal
Qesdeɣ amehbul yiwwas
Heggaɣ si yal d asteqsi.
Ad iyi d-yeḥku ɣef liḥala-s,
Ad issineɣ amek i-gettili.
Ad ẓreɣ amek i tga nniya-s,
Ddunnit amek i tt yettwali.
Yenna-d : ay-en i k id-yewwin
A k t id-iniɣ issin-it
Ad ak t in-fkeɣ d aɛwin
Ma ur k yeɛǧib ara eǧǧ-it
Atan umehbul meskin
Amek i-gettwali ddunnit.
Yemmeslay-ed ɣef zzman
Atan amek i la t iẓerr :
Yeqqers uḥebbas i zzman
Yebda ukessar di leɛmeṛ
Ma nebɣa a nḥaz ass deg wussan
Ifat qebl a t nẓer
Iɣawel way-en i d-yusan
Nettu d acu a d-nfekkeṛ
Serreḥ i waman ad lḥun…
Ur tezmireḍ at-teḥbesḍ ussan yettɛeddin
Am ṛṛmel ger iḍudan, ur ttɣimin,
Ur ḥebbsen, ur k ttṛaǧun…
Serreḥ i waman ad lḥun…
Ur ttagad lmut d way-en yuran
Ur neddem ɣef way-en i txedmeḍ d way-en yeḍran
Ula d ay-en i d-itedddun.
Serreḥ i waman ad lḥun…
At-twaliḍ lǧiha icebḥen di ddunit
Terreḍ-asen lqima i ṣṣbeḥ akk d tmeddit
Ma ulac a k ǧǧen, a k ttun
Tceɣb-aɣ teɣzi n leɛmeṛ
Anwa ur nheddeṛ fell-as!
Win d-yeǧǧan d acu a d-nfekkeṛ
Ɣas yemmut nettidir kulass.
Di lebni n zzman yeḥdeṛ,
Yettekki yebna-d ayla-s.
Serreḥ i waman ad lḥun…
Ur ttagad ṭṭef abrid ur nettwaṛkeḍ
Ɛeddi ansi ur ɛeddan, ɣli at-tekkreḍ,
Ussan fell-ak ad cfun.
Serreḥ i waman ad lḥun
Anida a kukrun wiyaḍ keč ma tqerrbeḍ
At-tḥulfuḍ s way-en ur iḥulfa wayeḍ
Lli-d abrid ttṛaǧun.
Serreḥ i waman ad lḥun…
Jeṛṛeb ddunnit, iḥfiḍ tissineḍ iman-ik,
Ḍegger ay-en n dir teddmeḍ ay-en yebɣa lxaṭer-ik
Lqima-k ad as rennun.
Lmut iceɣben lɛeql-ik
Fell-as aṭas i tɣellṭeḍ
Lemmer at-tɛiwdeḍ leḥsab-ik
Ulac-itt mi ara tt tagadeḍ
Asmi ara d-terzu s ixef-ik
Ulac-ik mi a tt d-temlileḍ
Serreḥ i waman ad lḥun…
Ḥseb ddunnit am wakk-en ur tettmettateḍ,
Mi a d-tas lmut ur k tẓerr, ur tt tẓerreḍ,
Wiyaḍ fell-ak ad ttrun.
Serreḥ i waman ad lḥun…
Lǧennet yakk d tmes anef-asen i wiyaḍ,
Amen d ddunnit, amen s way-en twalaḍ,
Akken ussan-ik ad ḥlun.
Serreḥ i waman ad lḥun…
Imawlan n ddunnit d widak yeffren,
Eǧǧ lmut d ayla kan n wid yemmuten,
Anef-asen yid-es ad lhun.
Serreḥ i waman ad lḥun…
Ay-en iɛeddan anef-as iṛuḥ iɛedda.
Ay-en a d-yeḍrun, eǧǧ-it ur tessineḍ ara,
Akken ussan-ik ad lhun.
Di ddunnit, di yal lqum,
Kul amehbul a d ak yini :
Win yesɛan taḥbult n weɣrum
D lɛecc ideg a yeddari
Ma yella ur yeḥkim di ḥed
Aḥkim fell-as ulaḥed
Winna yessaweḍ-itt ɣer lḥed
Yuɣal/Ḥesb-it d aqrib n Ṛebbi.
Serreḥ i waman ad lḥun
Ɣur-ek rwel seg wigad i-gḥesben Ṛebbi
D ayla nsen, ur qebblen amek i T nettwali
Ɣur-ek anida k ttɣurrun.
Serreḥ i waman ad lḥun
Tudert acḥal i tecbeḥ, ɣas d lfani
Ma teǧǧiḍ-tt at-tṛuḥ, tayeḍ ur d-tettili
Anef i wiyaḍ ad ḥkun.
Serreḥ i waman ad lḥun…
Atan d acu at-tawiḍ sɣur umehbul
Ɣas ma xuṣṣen imeslayen i s yekkan seg wul
Ma ur k nfeɛn, ur k ttḍurrun.
Serreḥ i waman ad lḥun…