Aryus

Aryus (s tlatinit: Arius, s tegrikit: Areios), ilul gar iseggasen n 250 d 256, yemmut deg useggas n 336, d aqessis amasiḥi, d amussnaw n tesnakuct, yedder deg temdint n Aleksandriya deg Maṣer. D netta i d amesnulfu n tmuɣli tamsɣant i wumi qqaren Taryanit, yegla-d s wuguren imeqqranen deg umezruy n teglizt tamsiḥit tamezwarut.

Tameddurt-is d Tlalit-is

Aryus ilul gar useggas n 250 d 256 S.Ɛ. (Seld Tallalit n Ɛisa) deg yiwet n temnaḍt tuzzigt n tmurt n Libya (Cyrenaïque) n zik, ayen i t-yerran d mmi-s n Tafriqt Ugafa. Ɣef leḥsab n yimazrayen, Aryus yella d argaz amesɣan yesɛan lqedd aṭas, yettwassen s tmusni-s d taywalt-is lqayen d yemdanen.

Yeɣra tasnillut(tasenakuct) deg temdint n Antyuc (Antioche) s ddaw ufus n umezraw meqqren Lusyan n Antyuc. Syin akkin, iruḥ ɣer temdint n Aleksandriya (Alexandrie) di Maṣer, anda yuɣal d aqessis deg teglizt n Bukalis. Dinna i d-yebda yettbecciṛ tiktiwin-is i d-ijebden aṭas n yemdanen ɣur-s, ama d imesnulfuyen, ama d imdanen n teglizt.

Asmi yewweḍ d ilemẓi, Aryus yeffeɣ seg tmurt-is, iruḥ ɣer temdint n Antyuc (Antioche), i yellan imiren d ammas ameqqran n tmusni d tesnillut (tasenakuct) deg usamar n temnekda. Dinna, yelmed s ddaw ufus n umezraw ameqqran Lusyan n Antyuc (Lucien d'Antioche). Lusyan-a yella d argaz yettwassnen s tmuɣli-s tamẓulant akked usekfel n yinumak inṣliyen n yedlisen iqedsen (tasekla). D netta i yessersen lsas i tektiwin n Aryus, imi deg uɣerbaz n Lusyan i d-yewwi Aryus iẓuran n tiẓri-s ɣef wassaɣ gar Yillu d Mmi-s. Lusyan yesseɣra-t amek ara yessemres tafelsafit taflaṭunit d tuɣẓint tagrigit i wakken ad yefhem asɣan, ayen i t-yeǧǧan ad yebnu tmuɣli tasnillut taqurant yerna teṣfa.

Ɣef leḥsab n yiglamen i d-yeqqimen seg tallit-nni, ama sɣur wid i t-iḥemmlen neɣ ula sɣur yicenga-s, Aryus yella d amdan i d-ijebbden lwelha. Yella d argaz yesɛan lqedd aṭas, d azedgan, yettlusu isebbaḍen iqebqaben s yinzaḍen imellalen d yiceṭṭiḍen iḥerfiyen i d-yeskanen tudert-is s wudem n ilugan n wasɣan. Ur yelli nettnadi ara ɣef zzhu n ddunit, ayen i t-yerran d amdan mu qadren aṭas n yemdanen. Imesniyen d yimazrayen fkan-d inigi belli Aryus yella d argaz d amezday, yesnen amek ara yemmeslay, yesɛa taywalt igerrzen, yerna d amesɣan i yeṭṭfen s tidet deg teflest-is(liman-is). Akka i d-yessers iman-is d amdan iwumi yezmer ad yamen ugdud.

Seld aselmed-is deg Antyuc, Aryus iruḥ ɣer temdint n Aleksandriya (Alexandrie) di Maṣer, tamdint i yellan d ul n usɣan d tfelsafit. Deg Aleksandriya, yettwasken d aqessis deg useggas n 313 S.Ɛ. s ufus n usqaf Acillas, yeṭṭef teglizt n Bukalis (Baucalis), i yellan d yiwet gar teglizin timeqqranin yerna yettwassnen aṭas di temdint. Dinna i d-yesbeggen iman-is d ambecciṛ yesɛan lhiba. Awal-is yella yettḥaz ulawen n yimdanen; yessexdam isefra d tezlitin tisɣanin i wakken ad yessefhem tiktiwin tiẓzayin n tesnillut i yimdanen iḥerfiyen, am yemnekcamen deg ssuq. S tarrayt-a, Aryus ur yeqqim ara kan d argaz n tmusni yettmeslayen d yimusnawen, maca yekcem ɣer tudert n yal ass n lɣaci. Yesdukkel-d ɣur-s aṭas n tlawin, imsenjiyen, akked waṭas n yimdanen seg ugdud, ula d kra n yisqafen iddan d tektiwin-is.

Leqdec-is ameqqran d wawal-is awzɣi rran-t d yiwet gar tugniwin yettwaqadren aṭas deg Aleksandriya. Asmi yemmut usqaf Acillas, Aryus yella gar wid i d-yufraren s waṭas i wakken ad yeṭṭef amkan n usqaf ameqqran n Aleksandriya, qbel ad yettwafren Aleksander (Alexandre d'Alexandrie) deg wemkan-is. D tagnit-a n tmeddurt-is tamezwarut, yeččuṛen d leqader akked tesnillut yebnan ɣef tmuɣli tagrigit, i d-yessufɣen syin akkin amjadel ameqqran n "Taryanit", i ibeddlen amezruy n tmasiḥit ɣer lebda.

Tiktiwin-is d Teẓriyin n Taryanit

Ayen i d-yewwi Aryus macci d tasreḍt tamaynut, maca d abeddel aẓuran deg tmuɣli ɣef wassaɣ gar Yillu (Rebbi) d Mmi-s (Ɛisa/Yasuɛ). Tiktiwin n taryanit bnant ɣef lsas n tmeẓla akked uqader ameqqran i tdukli n Yillu.

Yillu d Amagdaz: I Aryus, Yillu (Ababat) d yiwen, d azedgan, yerna d amagdaz. Ur yesɛi ara tazwara, ur yettnulfu ara, yerna ur yezmir ara ad yettwabḍu neɣ ad ibeddel.

Aryus yessexdem tamussni-s lqayen n tfelsafit d tmeẓla i wakken ad yessefhem agrudem n Yillu d wassaɣ-is akked txelqit. I Aryus, lsas amezwaru n tesnillut-is yebna ɣef yiwet n tikti ur nettwakkes: Yillu (Ababat) d yiwen, d awḥid, yerna d amagdaz s timmad-is. Anamek n "umagdaz" deg usatal-agi n tfelsafit-is d akken Yillu ur yesɛi ara talast, ur yeqqin ɣer wacemma, yerna yella yakan uqbel yal tawsit neɣ akud. Imi d amagdaz, ur yettbeddil ara, ur yettnulfu ara, ur yesɛi tazwara yerna ur t-id-yesnulfa yiwen. D netta i d aẓar amenzu n yal taɣawsa deg umeɣraḍ, maca netta s timmad-is ur d-yekki ara seg uẓar nniḍen. Yugar yal tawsit n txelqit yerna yella sennig-s.

Tiẓri-a tebna s wudem usrid ɣef tikti n "tumast" tazedgant d tmagdazt. Aryus yeqqar belli Yillu, imi d amagdaz, ur yezmir ara ad yettwabḍu. Lemmer ad yefk aḥric seg tumast-s i walebɛaḍ nniḍen — ula d Mmi-s — ayagi ad t-yerr d amdan yettwabḍan, d ayen i d-yemgaraden s telqayt d tmagdazt-is. Akken i t-iwala Aryus, ayen yettwabḍan yettbeddil, ma d ayen yettbeddilen ur yezmir ara ad yili d Yillu amagdaz. Ɣef waya, tella-d tmukrist-is tameqqrant akked wid yettamnen s Tkerḍit (Trinité) i d-yeqqaren belli Ababat d Mmi-s d Ṛṛuḥ Iqedsen sɛan yiwet n tumast, acku ɣer Aryus ayagi d asderfi n ccan n Yillu yerna d asexser n timmad-is.

S wakka, Aryus yewweḍ ɣer yiwet n teɣtest tabadut ɣef Mmi-s. Imi Yillu d amagdaz yerna ur yettwabḍu ara, yessefk Mmi-s ad yili d ayen d-yennulfan, macci d ayen yellan s yiwet n tumast akked Ubabat. Mmi-s, ɣas akken d aserɣan ameqqran yerna yettwaqader aṭas, d amenzu n txelqit, yettwaxleq-d (neɣ yettwasarew-d) sɣur Ubabat. Yillu d asaraw (générateur) awḥid, lebɣi-s d tezmert-is d nutni i d-yesrawen Mmi-s, Akka, Yillu yeqqim d amagdaz awḥid deg umeɣraḍ, yezzuzzren tiwuriwin-is d leqdec-is war ma yebḍa tigellit-is neɣ tumast-s tazedgant. Tiẓri-a tefka-d asenɛet lqayen i wamek i yeẓra Aryus asɣan: asḥissef ɣef ccan ameqqran n Yillu i d-yufraren sennig yal taɣawsa, war aḥric, war abeddel, ɣer lebda.

Asaraw n Mmi-s: Aryus yebna tiẓri-s ɣef yiwen n lsas yeqqaren: "Yella wakud ideg Mmi-s ur yelli ara". I Aryus, Ɛisa ur yelli ara zik-nni s yiwet n teɣzi akked Yillu. Yillu d netta i d asaraw amenzu i d-yessufɣen Mmi-s uqbel ad yexleq amaḍal.
Amyellel: Imi Mmi-s yettwaxleq (neɣ yettwasarew), ur yezmir ara ad yesɛu yiwet n tumast akked Yillu, yerna yella ddaw-as. D ayen i d-yesskanen belli Aryus ur yeqbil ara takraḍit (Trinité) akken i tt-fehmen wiyaḍ.

Asqamu n Niqya d Yimenɣi n Tesnillut(Tasenakuct)

Deg useggas n 318 S.Ɛ., yebda umenɣi gar Aryus d Usqaf Aleksander n Aleksandriya. Aleksander isufeɣ-d Aryus seg teglizt imi iwala deg tektiwin-is d "ffɣent i wubrid". Maca Aryus yufa tallelt ɣer waṭas n yisqafen n unẓul d usamar, gar-asen Usebyus n Nikumidya.

Amenkad n Ṛuma, Kunsṭantin Amezwaru, i yebɣan ad isdukkel tamnekda-s, icuɣef-it umjadel-agi i d-yebdan yettbabbaz tasreḍt tamasiḥit. Ɣef waya, yessegraw-d Asqamu amezwaru n Niqya deg useggas n 325 S.Ɛ. Deg usqamu-a, d teẓri n Athanase (Athanase d anelmad n Aleksander) i d-yufraren. Asqamu yeɣtes belli Mmi-s d Ubabat sɛan "yiwet n tumast" (homoousios). Aryus yugin ad yestenyi aɣtas-agi, yettwakkes-as wemkan-is, yettwanfa (yettwanfa ɣer Ilirya).

Taggara n Tudert-is

Tudert n Aryus ur tfukk ara di Niqya. Isqafen i t-iḥemmlen kemmlen amahil-nsen i wakken ad t-id-rren. Amenkad Kunsṭantin, ɣer taggara n tudert-is, yuɣal yessexdam aṭas n yiwellihen n yitaryaniyen, yerna yebɣa ad d-yerr Aryus s wudem unṣib ɣer teglizt deg useggas n 336 S.Ɛ., di temdint n Kunsṭantinupel. Maca, s wudem ur yettwarǧi ara, Aryus yemmut, yiwen n wass send(uqbel) agraw i as-d-heggan. Kra n yimussnawen d yimazrayen qqaren belli ahat tettwafk-as ssem (yettwasemmem).

Tazrirt d Umezruy n Taryanit

Ɣas akken yemmut Aryus, taryanit tekcem s lqedd deg umezruy. Iɣerfan igermaniyen igiṭiyen am Yiguten (Goths), Yiviziguten (Wisigoths) d Yivundaliyen (Vandales) qeblen tamasiḥit taryanit s ufus n uceggɛan Ulfilas.

Ayen yessewhamen, taryanit tuɣal-d ɣer Tafriqt Ugafa (tamurt tayemmat n Aryus) di lqern wis semmus s ufus n Yivundaliyen i d-yekcmen ɣer temnaḍt-a, bdan leḥkem-nsen zdat n tkatulikit tarumanit n Ugustin n Hippon. Amgired-agi n tesreḍt yegla-d s waṭas n tedyanin d yimenɣiyen gar yigelliden ivundaliyen d rruman deg Tmazɣa (Tafriqt Ugafa).