Anṭunin Piyus

Asebdad n Uqerru n Anṭunin Piyus.

Anṭunin Piyus (s tlatinit: Titus Aelius Hadrianus Antoninus Augustus Pius), illul deg useggas 86, yemmut deg 161. D amenkad n Temnekda Taṛumanit i yeḥkmen gar yiseggasen 138 d 161 S.Ɛ. Yella d yiwen gar "Semmus n Yimenkaden Igerrzen" n umezruy n Ruma. Tallit-is d tin i d-yefkan aṭas n telwit (Pax Romana), arkad akked wugar n tdamsa, war ma yella-d ccwal ameqqran neɣ azɣen di temnaḍin n temnekda-s.

Tameddurt Tamezwarut d Walluy ɣer Tnezmart

Illul Anṭunin deg temdint n Lanuyum (Lanuvium) deg Ṭṭalyan. Tawacult-is tella d yiwet gar tserkmin timeqqranin yerna yesɛan tanezmart di tsertit n Ṛuma.

Mi qrib ad yemmet umenkad Hadriyan, yeẓra belli Antuninus d argaz imekdi ɣer tmurt-is, u d aɣeswa aḥeqqi. Ɣef waya, yerra-t d amekkasu-ines unṣib, maca isres-d yiwet n tewtilt: akken Antuninus ad yeḥkem, yewwi-d fell-as ad yerrez d imekkasiyen mbeɛd-is sin n yimsedayen, Mark Urel (Marcus Aurelius) akked Lusyus Virus (Lucius Verus). Antuninus yeqbel agatu-agi, yerna ikemmel d win i yettqadaṛen insayen n uwanek.

Tunefka n yisem "Piyus"

Asqamu Aṛumani yefka-as isem n Piyus, win i yemmalen leqder d tmusni. Ssebba tamezwarut n yisem-a, d akken yugi ad yeǧǧ asqamu ad yekkes ccan i baba-s s usmemmi Hadriyan, yerna yessenqad-it akken ad yili Hadriyan d agerram neɣ d ayuc gar iyucen n Ṛuma. Daɣen, isem-a yemmal leqder-is i yemma-s, i twacult-is, d yiserdasen-is.

Tasertit n daxel d teɣdemt

Afakan n Anṭunin Piyus akked Fustin deg unmager n Ṛuma.

Tallit n Anṭunin Piyus d tin n talwit d tenkelwit tameqqrant. Yerr-a tamawt ɣer usedbel n tɣiwanin, yessifsus taɛkemt ɣef yimezdaɣen, yerna yefka azal ameqqran i usaḍuf d teɣdemt. Yettwassen s leqder-is i yizerfan n yemdanen, am wid yettwakerfen neɣ igellilen. Yefka tilisa i lecɣal n yinemhalen i yexedɛen tamurt, yerna yessuter deg yimḍebbren n tɣiwanin ad ilin d imelsiyen deg lecɣal-nsen.

Mgarad d yimenkaden-nniḍen (am Hadriyan i yunagen deg umaḍal aṛumani), Anṭunin ur yeffiɣ ara akk seg temdint n Ruma d Ṭṭalyan s umata deg 23 n yiseggasen n udabu-s. Yesseḥbaber ɣef usɣim n udabu s lqedd, u yefka agemmir akked wazal i Useqqamu n Yimɣaren (Sina).

Asebdad n Anṭunin Piyus s wudem userdas.

Xas akken imenkaden n zik llan ttafen lxaṭer deg yimenɣiyen d usemɣer n tlisa n tagelda, Anṭunin Piyus yextaṛ abrid nniḍen. Yesɛedday akud-is deg usefrek n tadbelt n daxel. Yerr-d tadamsa n tagelda ɣer uswir yelhan, yessenqes tixessarin, yerna yefka afud i yimzenza d yimassanen. Deg tallit-is, igezda n tagelda taṛumanit ur ssinen ara aṭas n yimenɣiyen, ala kra n yemcumen imecṭaḥ i yellan deg tlisa n Briṭanya, n Tefriqt ugafa, d Legrig.

Anṭunin Piyus yettwassen s waṭas s teɣdemt-is d wawal-is yelhan ɣef yimeɣbanen d yigellilen. Yexdem aṭas n yibeddilen deg yisuḍaf iṛumaniyen akken ad yili umtawa d teflest gar yimdanen. Yiwen seg yisuḍaf-is ittwassnen d win i d-yeqqaren: "Yal amdan yettwaḥsab d amelsi alamma ibeggen-d bab n teɣdemt d akken d amezzmen." Aya d amenzay i mazal yettwaseqdec ass-a deg waṭas n tmura n umaḍal. Daɣen, yefka izerfan i yimeɣbanen d yigujilen, yerna yexdem akken ad yili wawal i wakken ad ttwakksen tikli n uqraḥ i yemdanen ur nesɛi ara tillas. Ma d aklan, yefka-asen kra n yiberdan akken ad uɣalen d ilelliyen ma yella bab-nsen yexdem fell-asen kra n wassas neɣ leḥqer.

Tasertit Tawerdanit d Tdamsa

Tadamsa, Tasiḍent d Tnezzut

Tallit n Anṭunin Piyus tella d yiwet n tallit yufraren deg wayen yeɛnan ayen yelhan i wegdud, acku yeṭṭef tigad n tedrimt s ṣṣwab. S useqdec iwatan n tsiḍent d wexzan n yedrimen, yeǧǧa-d Ruma deg yiwen n waddad yeččuran d tabaɣurt. Yernu iseggem tanezzut di yal tama n yilel Agrakal, ayen i d-yewwin tiwsiwin timaynutin i wegdud.

Yebna aṭas n yisalayen akked ifakanen, iɣbula n waman, akk d yizenqan i isehlen taywalt akked umesni gar temdinin n temnekda.

Azbu, Igen akked wuḥrez ɣef Tlisa

Tilisa n tmnekda taṛumanit deg tallit n umenkad Anṭunin Piyus.

Ɣas akken adabu-s yebna ɣef talwit, yella yettḥadar ɣef temnaḍin n Ruma mgal anṭag n yiberraniyen:

Deg Briṭanya Tameqqrant (Ekusta / Écosse ass-a), yefka annaḍ i yigen-is ad bnun "Aɣrab n Anṭunin", i d-yezgan deg ugafa n Uɣrab n Hadriyan. Iswi-s d azbu mgal aẓḍam n iɣerfan n ugafa.

Yessefru kra n yimenɣiwen imecṭuḥen deg Mauritanya (Tafriqt n Ugafa), deg Surya d Surya-Falasṭin s waṭas n uqader, war ma yella-d ccwal ameqqran neɣ tuzzma meqqren. Igen Aṛumani yeqqim d imnekdi u d yeǧhed s waṭas deg 23 iseggasen-nni.

Tukkest

Mi yemmut deg useggas 161 deg Lorium (Ṭṭalyan), Anṭunin Piyus yeǧǧa-d tukkest n temnekda teẓwer, teǧǧuǧeg, yerna yeṣfa wudem-is. Amekkasu-ines, Mark Urel, yeṭṭef asɣim n temnekda yerna ikemmel abrid n tsertit n telwit. Amezruy yettawali Antuninus am umatar ameqqran n tqacuct n uǧuǧeg d talwit deg umaḍal aṛumani aqbur.