Acbayli

Seg Wikipedia
Neggez ar: ẓer isebtar, anadi

Nuvola apps filetypes.png Asebtar-agi d agujil : ulac asebtar wayeḍ ansi ara d-tekkeḍ ɣer da.
Nadi asebtar (neɣ isebtaren) wiyaḍ, anda tzemreḍ ad tgeḍ arruz i iheddun ar asebtar-agi, umbeɛd ekks talɣa-yagi.

Acbayli neɣ acbali neɣ acbaylu, d yiwen ujeqdur yettwaxedmen s ufexxar, d ameqran aṭas, yecba "tasebbalt", maca yugar-itt ama deg lqedd, ama deg wanect yezmer ad t-yawi d rreẓq. Acbayli sseqdacen-t i wakken ad ffren deg-s zzit. Tteffren deg-s tasmekta (quantité) d tameqrant n zzit, imi deg-s ay xezznen zzit n wayt wexxam. Wid yesɛan aṭas n uzemmur, zemren ad sɛun aṭas n yecbuyla.

Acbayli d azuran yernu ur yerqim ara. Yuɣ lḥal, Imaziɣen, s umata, reqqmen ijeduren-nsen, yernu Tamurt n Leqbayel d yiwet seg tmiwa tmaziɣin anda ay ttacaṛen ijeqduren-nsen d rrqumat. D acu kan, ijeqduren n ussewwi, am yemserbeḥ ay deg ssewwayen aɣrum, neɣ taccuyt d useksut, ur ten-reqqmen ara. D acu kan, deg wagguren-agi iɛeddan, rziɣ ɣef Tipaza yernu walaɣ dinna kra seg yijeqduren n ufexxar n Yicenwiyen, u walaɣ dakk-n ɣer-sen reqqmen ula d taccuyin ! D acu kan, acbayli ur yelli seg yijeqduren ay reqqmen, xas ma yella ur t-sseqdacen ara i ussewwi, maca yewwi-yi-d Ṛebbi dakk-n ur t-reqqmen ara acku yettɣimi deg yimukan yeffren, deg texxamt n lexzin neɣ deg teɛrict.

Zik, Leqbayel llan zeddɣen deg leḥwaṛi. Yiwet n lḥaṛa zemren ad ilin deg-s waṭas n yexxamen d waṭas n twaculin. Dɣa tikkwal, tiwaculin-agi sɛant deg texxamt-nni taxxamt n lexzin, anda ay xezznen nneɛɛma-nsen. Taxxamt-nni ala amɣar neɣ tamɣart n lḥaṛa ay yesɛan tasarut-is. D acu kan, deg wexxam n Leqbayel aqdim, medden sɛan amkan niḍen anda ay xezznen, wagi d "taɛrict". Taɛɛrict neɣ takanna bennu-tt medden nnig n uddaynin, deg wexxam-nni ay deg ttidiren. Taɛrict d taɛlayant yernu tikkwal ḥeǧǧben-tt-id s weɣrab u ttgen-as tawwurt. Tasarut-is, daɣen tettɣimi kan ɣer yemɣaren n wexxam, yernu deg-s ay tteffren rreẓq n wayt wexxam. Icbuyla nezmer ad ten-naf ama deg teɛrict neɣ deg texxamt n lexzin.

Yuɣ lḥal, medden ttgen leqrar ameqran i zzit-nsen, acku zzit d yiwet seg lɣellat yesɛan azal meqqren akk ɣer Leqbayel. ɣef way-a, acbayli ttgen-as tadimt, messlen-as-tt-id am tbaqit (aḍebsi ameqran ay deg tetten), yernu srusuyen-as-tt sufella. Mi ara as-ssersen tadimt-nni i wecbayli, ad as-tt-selɣen, ɣef yiran, s zzbel n tfunast. Zzbel-nni, mi ara yeqqar, ad yeqqim d ḍḍmana ay d-yesskanen dakk-n tasebbalt-nni ur tt-yeldi yiwen. Medden ttcemmiɛen icbuyla s zzbel i wakk-n ur ttilin ara yiɛeggalen n wexxam ara yakren seg zzit-nni, yernu s umata, d tamɣart n wexxam ay yettalasen ad d-teldi icbuyla i wakk-n ad d-ddmen seg-sen zzit.

Dɣa yessefk ad d-nini dakk-n ula d ikufan ttgen-asen tidima u sellɣen-tent s zzbel u yessefk ad d-nger tamawt dakk-n zik, llan sseqdacen medden zzbel n tfunast mebla ma ɣunfan-t, acku zzbel, akk-n yebɣu yili, zeddig, u mi ara yeqqar, ur yezmir ara ad yessenṭeḍ aḍḍanen. Dɣa ḥekkun-d yiwet n temɛayt ɣef yiwet n teslit ay yukren irden seg ukufi. Yuɣ lḥal, akk-n d-nniɣ, d tamɣart ay d myal n ṛṛay deg wexxam, zik-nni, dɣa tella yiwet n teslit d nneyya, tella tebɣa ad taker irden seg ukufi, yili tamɣart-is teɣleq akufi-nni s tadimt n yiferki u tesleɣ-itt s zzbel. Tislit-nni tekkes-d tadimt-nni, teddem-d irden, sakk-in, mi terra tadimt-nni, tɛawed tesleɣ-itt s zzbel. D acu kan, zzbel-nni iban d ajdid ama deg llun-is, ama deg rriḥa-s. Mi d-tewweḍ temɣart-is tenna-yas : "Anwa ay yeldin akufi  ?". Tenna-yas teslit-is : "Ur t-yeldi yiwen". Tenna-yas temɣart-nni : "I zzbel-agi, ata-n mazal-it d azegzaw, anwa ay t-yerran ?". Tislit-nni tenna-yas : "D azger ay d-iɛeddan syenna, yeḍreg-it". Dɣa tenna-yas temɣart-is : "D acu ara yawin araṭiw n wezger s akufi ?". Tamɛayt-agi qqaren-tt-id ɣef win ixeddmen lumuṛ s tuffra u s tḥila, maca mi ara yettwaṭṭef, ur yessin ara ad yeskiddeb.